ERMENI HABER AJANSI

Թուրքիայի վարչապետ և  նախագահի թեկնածու Ռեջեփ Թայիփ Էրդողանի խոսքերը՝ «Ներողություն, ինձ անգամ հայ են անվանել»,  հասարակական լայն արձագանք են ստացել:

Լրագրողները, բլոգերներն անկախ  ազգային և կրոնական պատկանելիության քննադատեցին Էրդողանին, հնչեցին նաև ներողություն խնդրելու կոչեր:

Թուրքահայ մտավորականներն էլ հանդես եկան հայտարարությամբ՝ Էրդողանին խորհուրդ տալով զբաղվել իր գործերով և իրենց թիրախ չդարձնել:

Էրդողանի հայտարարությունը պատեհ առիթ դարձավ ընդդիմադիրների՝ հատկապես «Ազգայնական շարժում» կուսակցության ներկայացուցիչների համար, որպեսզի նախագահական ընտրություններից առաջ սևացնեն հաղթողի հիմնական թեկանածուին:

Ուշագրավ է, որ տարիներ շարունակ հայերին հալածած, «հայ» բառը հայհոյանք, վիրավորանք համարող ազգայնականներն են արդեն պաշտպանում հայերին: Սակայն ինչեր ասես, որ չես անի քաղաքական շահերի համար այն էլ նախագահական ընտրություններից առաջ:

Ընդդիմադիրներն անգամ պատրաստվում են դատարան դիմել այլատյացություն սերմանելու փաստարկով Էրդողանին պատասխանատվության ենթարկելու համար:
Մինչդեռ շարունակվում են  Էրդողանին և նրա խոսքերը որակավորող, մեկնաբանող  հրապարակումները, մեղադրանքները և ներողության կոչերը, «Ակոս» թերթն Էրդողանին ներելու ծանր բեռը թողնում է Ալլահին, իսկ  «Բիրգյուն» թերթը լույս է տեսել Թուրքիայի վարչապետին լավագույնս բնութագրող շապիկով՝ «Շատ ներողություն, ֆաշիստ»:

Անահիտ Վեզիրյան

Ermenihaber.am