Թուրքիայի Բաթման նահանգի Սասուն շրջանի մերձակայքի Մարաթուք լեռան վրա գտնվող հայկական Սուրբ Մարիամ Աստվածածին եկեղեցու ավերակների միջից հնամյա մի պատմական գիրք և որոշ արժեքավոր գտածոներ են հայտնաբերվել: Այս մասին, ըստ թուրքական «Մայնեթ» կայքի, տեղեկացրել է «Սասունի հայերի միության» նախագահ Ազիզ Դաղջըն:

Նշվում է, որ եկեղեցում վերանորոգման աշխատանքներ իրականացնել կարողանալու համար կազմակերպվել է տեղանքի մաքրում և ավերակ կտորների հավաքում: Այդ աշխատանքներին միացել են Բաթմանի թանգարանի մասնագետները:

«Ավերակների միջից գտել ենք խաչի տեսքով ֆիգուրներ, ձիու սմբակի նալեր, հայերեն գրությամբ մի մեծ գիրք»,- պատմում է Դաղջըն` նշելով, որ գտածոների մասին անմիջապես տեղեկացրել են տեղի ժանդարմերիային և դրանք հանձնել Բաթմանի թանգարանին:

«Մեր նպատակն է 2 տարի առաջ փլուզված այս եկեղեցին վերականգնել և վերանորոգել: Ենթադրում ենք, որ 2.973մ բարձրություն ունեցող Մարաթուք լեռան գագաթին գտնվող այս եկեղեցում հայտնաբերված գտածոները շուրջ 2.000 տարվա պատմություն ունեն: Նաև դիմել ենք Բաթմանի նահանգապետարան դեպի եկեղեցի տանող առանձին ճանապարհ բացելու ցանկությամբ»,- եզրափակել է «Սասունի հայերի միության» նախագահը: 

Ermenihaber.am