ERMENI HABER AJANSI

Այն բանից հետո, երբ Թուրքիայում իշխող «Արդարություն և զարգացում» կուսակցության (ԱԶԿ-AKP) փոխնախագահ Մեհմեթ Ալի Շահինը պաշտոնապես հայտարարեց, որ օգոստոսի 10-ին կայանալիք նախագահական ընտրություններում իշխանությունների առաջադրած թեկնածուն Ռեջեփ Թայիփ Էրդողանն է, Twitter սոցցանցում հայտնվեցին դժգոհ ու դատապարտող գրառումներով արձագանքներ:

Լուսանկարում` ժողովուրդ, զինվոր, ոստիկան, Էրդողան:

Թուրքական «Ջումհուրիյեթ» պարբերականը ներկայացնում է Թուրքիայի հանրային դեմքերի` Էրդողանի թեկնածությանն առնչվող թվիթերյան գրառումները:

Գոնջա Վուսլաթերի

Այսպես գնալով շատ լավ հետընթաց ենք ունենալու:

Սելամի Ինջե

Բարի գիշեր Թուրքիա, խավարի մեջ մնա:

Ֆերդան Էրգութ

Հապա մի նայեք Էրդողանի թեկնածության առաջադրման արարողությանը. հարուստները հրապարակում են իրենց թեկնածուին:

Լևենթ Քազաք

Քիչ մնաց, շուտով մոտիկից ծանոթանալու ենք «դեմոկրատական սուլթանության» հետ:

Օրհան Այդըն

Հայտարարեցին… շոուն սկսվեց, հետադիմական հրոսակները երկիրը ոտից-գլուխ զավթելու հարցում վճռական են:

Հիշեցնենք, որ օգոստոսի 10-ին Թուրքիայում առաջին անգամ հանրաքվեի միջոցով անցկացվելու են նախագահական ընտրություններ: Ժողովուրդը ընտրելու է Թուրքիայի 12-րդ նախագահին: Այժմ հայտնի է, որ ընտրություններում Էրդողանի մրցակիցներն են ընդդիմադիր ուժերի` «Ժողովրդահանրապետական» և «Ազգայնական շարժում» կուսակցությունների առաջադրած միասնական թեկնածու Էքմելեդդին Իհսանօղլուն և քրդական «Խաղաղություն և ժողովրդավարություն» կուսակցության թեկնածու Սելահաթթին Դեմիրթաշը:

Ermenihaber.am