«Իրաքի և Լևանտի իսլամական պետութան» ահաբեկիչները ստացել էին Թուրքիայի աջակցությունը

Տարածաշրջան08:59, 14 Հունիս 2014

«Իրաքի և Լևանտի իսլամական պետութան» ահաբեկիչները ստացել էին Թուրքիայի աջակցությունը

Թուրքիայի Մարդին քաղաքի քաղաքապետ, ազգությամբ քուրդ ընդդիմադիր գործիչ Ահմեթ Թյուրքը լրագրողների հետ հանդիպմանն անդրադարձել է Իրաքի Մոսուլ քաղաքում ահաբեկիչների կատարած ռազմական գործողություններին: Նա Թուրքիայի իշխանություններին նախևառաջ մեղադրել է ոչ վաղ անցյալում «Իրաքի և Լևանտի իսլամական պետություն» (IŞİD) ծայրահեղական խմբավորման զինյալներին Թուրքիայի սահմանից Սիրիա անցնելու թույլտվություն տալու համար: Հիմա արդեն նույն այդ IŞİD-ի գրոհայինները Մոսուլում ներխուժել են թուրքական հյուպատոսարան և գերեվարել թուրք դիվանագետների:

«Թուրքիան աջակցություն է ցուցաբերել IŞİD-ի հրոսակներին և խաղաղության գործընթացի մասին խոսքերի մեջ իրականում անկեղծ չէ»,- ըստ «Ջումհուրիյեթ» կայքի` ասել է Ահմեթ Թյուրքը:

Վերջինս պատմում է, որ թեև թուրքական իշխանություններն աչք էին փակում այն բանի վրա, թե ինչպես են IŞİD-ի գրոհայինները թուրքական սահմանով հանգիստ անցնում Սիրիա, բայց Մարդինի բնակիչներն իրենց աչքով են բազմիցս տեսել, թե ինչպես էին Սիրիայում վիրավորված IŞİD-ականներին ընդունում Թուրքիայում և բուժում, մինչդեռ վիրավորված քրդերին արգելում էին թուրքական սահմանից ներս մուտք գործել:

Քուրդ քաղաքապետը նաև նշել է, որ իրենք բազմիցս զգուշացրել էին թուրքական իշխանություններին, որ IŞİD-ը մի օր փորձանք կբերի հենց Թուրքիայի գլխին:

Ermenihaber.am

Այս ենթաբաժնի վերջին նորությունները

12:53, 12 սեպ

Ֆիդան․ Կատարի դեմ հարձակումը պետք է սթափեցնի Նեթանյահուին հանդուրժողներին

Թուրքիայի արտաքին գործերի նախարարը Հռոմում իտալացի գործընկերոջ հետ կայացած համատեղ մամուլի ասուլիսում անդրադարձել է Իսրայելի կողմից Կատարի վրա ռմբակոծությանը: