ERMENI HABER AJANSI

Թուրքիայի խորհրդարանի նախագահ Ջեմիլ Չիչեքը ելույթ է ունեցել Բաքվում կազմակերպված «Թյուրքախոս երկրների խորհրդարանական վեհաժողովի» (TÜRKPA) 5-րդ լիագումար նիստում և, ի թիվս այլ թեմաների, անդրադարձել նաև ղարաբաղյան հիմնախնդրին: Ինչպես հայտնում է «Ավրուփա գազեթեսի» լրատվական կայքը, Չիչեքը TÜRKPA-ի անունից ներկաներին վստահեցրել է, որ իրենք երբեք հետքայլ չեն անի Ղարաբաղի հարցում ունեցած ընդհանուր դիրքորոշումից: Ըստ նրա` պետք է վերջ դնել «ադրբեջանական հողերի հայկակա օկուպացիային», վերադարձի հնարավորություն տալ «ադրբեջանցի միլիոնավոր փախստականներին» և դրանով իսկ նպաստել կովկասյան տարածաշրջանի կայուն խաղաղությանը:

«Այս հարցում մենք լիովին աջակցում ենք Ադրբեջանին: Թուրքիան, որպես Ադրբեջանի եղբայրն և Մինսկի խմբի անդամ, շարունակելու է ջանքեր ներդնել հիմնախնդիրն Ադրբեջանի տարածքային ամբողջականության շրջանակներում խաղաղ ճանապարհով լուծելու համար: Միջազգային բոլոր ժողովներին, որոնց մասնակցում եմ, իմ արտաքին բոլոր շփումներում այդ մասին ես միշտ շեշտում եմ»,- ասել է Ջեմիլ Չիչեքը:

Պարզաբանենք, որ TÜRKPA-ն ստեղծվել է 2009 թվականին: Այժմ անդամակցում են Թուրքիան, Ադրբեջանը, Ղազախստանը և Ղրղզստանը: Կազմակերպության հիմնական նպատակը թուրքախոս երկրների փոխօգնությունն է միջազգային կազմակերպություններում, թուրքախոս երկրների միջև հարաբերությունների խորացումը, տնտեսական կապերի ընդլայնումը, մշակութային և այլ համատեղ ծրագրերի իրականացումը: Ուզբեկստանն ու Թուրքմենստանը հրաժարվել են մաս կազմել այդ կառույցին:

Ermenihaber.am