ERMENI HABER AJANSI

Դերսիմում, Վաքըֆլը գյուղի նման, բացառապես հայերով բնակեցված գյուղ կարող է հիմնվել: Այդ մասին, http://akunq.net/ -ի փոխանցմամբ, հայտարարել է Դերսիմի հայերի հավատքի և սոցիալական փոխօգնության միության ներկայիս նախագահ Իսմայիլ Ջեմ Հալավուրթը:

Թուրքական «Գազեթա 24» լրատվամիջոցի համաձայն` սույն թվականի մայիսի 3-ին դերսիմահայերը հավաքվել են Ստամբուլի Գում Գափու թաղամասի մոտակայքում գտնվող Սուրբ Հարություն եկեղեցու սրահում: Շուրջ 250 հոգու մասնակցությամբ կայացած երեկույթին մասնակցել են նաև եպիսկոպոս Սահակ Մաշալյանը, Սասունահայերի միության նախագահ Արամ Դեմիրը, Գում Գափուի վաքըֆի ղեկավարներից Արուշ Թաշը, ինչպես նաև` բազմաթիվ դերսիմահայեր:
Երեկույթին ելույթ ունեցած Իսմայիլ Ջեմ Հալավուրթը հայտնել է, թե սույն պաշտոնին նշանակվելուց հետո միությունն այցեր է կատարել Պոլսո հայոց պատրիարքարան և մի քանի այլ հաստատություններ, որոնց հետ հաստատվել են փոխադարձ վստահության վրա հիմնված հարաբերություններ:
Միության նախագահը նաև տեղեկություններ է հաղորդել կազմակերպության առաջիկա ծրագրերի վերաբերյալ, ըստ որոնց` շուտով վախճանված դերսիմահայերի հոգիների խաղաղության համար հոգեհանգստյան արարողություն է կազմակերպվելու, իսկ առաջիկա տարիներին միությունը 4-5 օրով ուխտագնացություններ է կատարելու դեպի Դերսիմ` այդպիսով ամրապնդելով հայրենի հողից հեռացած դերսիմցիների կապը ծննդավայրի հետ:

Ըստ Իսմայիլ Ջեմ Հալավուրթի` միությունը ծրագրում է նաև այցելել Երևան և աշխատանքներ տանում` «Դերսիմսպոր» և «Արարատ» ֆուտբոլային թիմերի միջև բարեկամական խաղ կազմակերպելու ուղղությամբ:

Միության ղեկավարության օրակարգում է նաև 1938 թ. Դերսիմի կոտորածի ժամանակ ռմբակոծված Սուրբ Կարապետ հայկական վանքի վերանորոգումը և վերաբացումը:
Հալավուրթի ելույթում ամենաուշագրավ թեման հայկական գյուղի մասին ծրագիրն է: Դերսիմահայերի միության նախագահն այդ ծրագրի վերաբերյալ մասնավորապես նշել է. «Թերևս ոչ մոտ ժամանակներս, սակայն երկարաժամկետ ծրագրում պլանավորում ենք մի հայկական գյուղ հիմնել Դերսիմում, որը ստեղծվելիք կոոպերատիվների և ձեռնարկությունների միջոցով կարող է ապահովել ինքն իրեն: Այդ գյուղն Անատոլիայում (Արևմտյան Հայաստանում-Ակունքի խմբ.) խորհրդանշական կդառնա և կլինի երկրորդ հայկական գյուղը` Վաքըֆլըից հետո »:

Հալավուրթը նաև նշելով, որ Դերսիմը հայկական օջախ է եղել, շեշտել է. «1915-ին և դրանից հետո տեղի ունեցած դեպքերի ժամանակ կյանքը կորցրած մարդկանց հոգիներն սկսել են խաղաղություն գտնել: Մեր միությունը, որպես Անատոլիայում ապրած հայ ժողովրդի մի փոքրիկ մասնիկ, շարունակելու է տեր կանգնել իր հողին, անցյալին և ինքնությանը»:
Երեկույթին մասնակցել է նաև համշենահայկական «Վովա» խումբը, որը հանդես է եկել համշենական երգերի կատարմամբ:

Ermenihaber.am