ERMENI HABER AJANSI

Երկու ատոմակայանների կառուցման ծրագրի հաստատումից հետո թուրքական իշխանությունները մտադիր են նախաձեռնել նաև երրորդի կառուցումը: Ինչպես տեղեկացնում է «Մեդյա 365» լրատվականը, երրորդ ատոմակայանը նախատեսվում է կառուցել դարձյալ սևծովյան Սինոպ շրջանում, որտեղ արդեն որոշված էր մեկ այլ ատոմակայան կառուցել: Թուրքիայի էներգիտակայի և բնական պաշարների նախարարություն արդեն սկսել է կառուցվելիք 3-րդ ատոմակայանի վայրի ընտրության նախապատրաստական աշխատանքները:

Այն մտահոգությանը, թե երկու ատոմակայան նույն վայրում` Սինոպում, կառուցելը արդյոք խնդրահարույց ու վտանգահարույց չէ, պատկան մարմինները, ըստ նույն աղբյուրի, պատասխանել են. «Սինոպն ըստ էության ունի ատոմակայանի կառուցման համար անհրաժեշտ պայմաններ: Արդեն պատրաստի հնարավորությունները 3-րդ ատոմակայանի համար էլ կարող են օգտագործվել»:

Թուրքիան էլեկտրաէներգիայի պահանջի աճի ցուցանիշով Եվրոպայում համարվում է առաջինը, աշխարհում` երկրորդը, Չինաստանից հետո: Այժմ Թուրքիան էներգակիրների հարցում մեծ կախվածություն ունի արտաքին աշխարհից: Տարեկան իր սպառած գազի 98, նավթի 92 և ածխի 30 տոկոսը Թուրքիան ներկրում է արտերկրից: Մինչև Թուրքիայի Հանրապետության հռչակման 100 ամյակը (2023թ.) թուրքերը ծրագրել են ունենալ 3 ատոմակայան:

Հիշեցնենք, որ նախորդ 2 ատոմակայանի կառուցման ծրագրերը Թուրքիան որոշել է իրականացնել Ռուսաստանի, Ճապոնիայի ու Ֆրանսիայի հետ համատեղ: Ըստ նախատեսվածի` միջերկրածովյան Աքքույու շրջանում թուրքերը ռուսների հետ կառուցելու են ատոմակայան, որը պետք է շահագործման հանձնվի 2022 թվականին: Իսկ Սինոպում ճապոնացիներ և ֆրանսիացիների հետ համագործակցությամբ պետք է կառուցվի 2-րդ ատոմակայանը: Հաշվարկված է, որ նշյալ բոլոր ատոմակայանների կառուցման ու շահագործման արդյունքում Թուրքիան կկարողանա 16 մլրդ խմ գազ պակաս ներկրել` այդպիսով տնտեսելով տարեկան ավելի քան 7 մլրդ դոլար:

Ermenihaber.am