Թուրքիայի նախագահը ելույթ է ունեցել` լացը զսպելով (վիդեո)

Տարածաշրջան13:51, 15 Մայիս 2014

Թուրքիայի նախագահը ելույթ է ունեցել` լացը զսպելով (վիդեո)

Թուրքիայի նախագահ Աբդուլլահ Գյուլը գտնվում է Մանիսա նահանգի Սոմա շրջանում, որտեղ մայիսի 13-ին ածխհանքում խոշոր վթար էր տեղի ունեցել:

Սոմայում Գյուլը, արցունքները հազիվ զսպելով, ելույթ է ունեցել հավաքվածների առջև: Նա ներկաներին վստահեցրել է, որ այսուհետև ամեն ինչ անելու են, որպեսզի նման սարսափելի դեպքեր չկրկնվեն:

«Մեր ցավը շատ մեծ է: Այն միայն այստեղ գտնվողների ցավը չէ, վերածվել է ամբողջ թուրք ժողովրդի ցավի: Նախևառաջ այստեղ զոհված իմ եղբայների ընտանիքներին, մայրերին, հայրերին, կանանց, երեխաներին և ամբողջ թուրք ազգին ցավակցում եմ»,- Գյուլի խոսքերը մեջբերել է թուրքական «Հաբերլեր» լրատվական կայքը:

Թուրքիայի նախագահը նշել է, որ ածխահանքում գտնվողների դուրսբերման համար փրկարարական աշխատանքները շարունակվելու են առանց ընդմիջումների: Նա նաև շնորհակալություն է հայտնել բոլորին, ովքեր աշխարհի տարբեր կողմերից ցավակցություն և զորակցություն են հայտնում Թուրքիային:

Հիշեցնենք, որ Թուրքիայի արևմտյան Մանիսա նահանգի Սոմա շրջանում գտնվող ածխահանքում, նախնական տեղեկությունների համաձայն էլեկտրական խոտանի հետևանքով բռնկվել էր հրդեհ և խոշոր վթար տեղի ունեցել: Հանքում այդ պահին գտնվելիս էեղել 787 աշխատակից: Վթարի զոհերի թիվը այս պահի դրությամբ հասել է 282-ի: Տեխնածին այդ աղետի կապակցությամբ Թուրքիայում հայտարարվել է եռօրյա սուգ: