ERMENI HABER AJANSI

Եվրատեսիլ- 2014 երգի մրցույթում Հայաստանը ներկայացնող Արամ MP3-ն թուրքական «Միլլիյեթ» օրաթերթին հարցազրույց է տվել: Թերթը գրում է, որ այս տարվա մրցույթում մասնակիցների մեջ 2 անուն են առանձնանում ` մեկը Ավստրիան ներկայացնող սկանդալային Կոնչիտա Վուրսթն է, մյուսը Հայաստանը ներկայացնող Արամ MP3-ն, ով բուքմեյքերների ֆավորիտն է:

Ստորև ներկայացնում ենք հարցազրույցը` որոշ կրճատումներով.

Ձեր երկրում Ձեզ ավելի շատ ճանաչում են հեռուստաշոուներում խաղացած դերերով: Ի՞նչը Ձեզ ստիպեց հումորիստի կարիերան մի կողմ թողնել և երաժիշտ դառնալ:

Դեռևս ուսանող տարիներից խաղացածս սկեչերում երաժշտական կատարումներ եմ ունեցել: Հանդիսատեսի հետ 2 տարբերակով եմ հաղորդակցվում. մեկը` երգի,  մյուսը սրամիտ կատակի միջոցով: Երկուսն էլ միշտ կլինեն:

Իսկ ո՞րն է Ձեզ համար առաջնահերթություն:

Մարդկանց կյանքում կարևոր տեղ ունեցող ցանկացած բան ինձ համար առաջնահերթություն է:  Կարծում եմ, որ արվեստը տարբեր մարդկանց միավորելու հանճարեղ ճանապարհ է: Արվեստի շնորհիվ այս աշխարհում ոչ ոք միայնակ չէ:

Մինչև այժմ Հայաստանը ավելի շատ էթնիկ երգերով է ներկայացել Եվրատեսիլին: Իսկ Ձեր երգը «dubstep» ենթակառուցվածք ունի:

Ճիշտն ասած դժվար ընտրություն է եղել: Հայ  և արտասահմանցի կոմպոզիտորների շուրջ 75 երգեր են քննվել ու ընտրվել է « Not Alone»-ը: Այս երգը ընտրելու հարցում հաշվի է առնվել երգի համապատասխանությունը ներկայիս երաժշտական տենդենցներին, ինչպես նաև երգի ուղերձ պարունակող բառերը:

Ըստ Ձեզ , ո՞րն է հայկական երաժշտության առանձնահատկությունը:

Հայերի զգացմունքայնությունը արտահայտվում է երաժշտության մեջ: Հայկական ստեղծագործությունները անմիջապես լսողի սրտին են հասնում:

Ermenihaber.am