Պոլսի Հայոց պատրիարքությունը ընդունել է Էրդողանի ցավակցությունը

Հասարակական13:57, 24 Ապրիլ 2014

Պոլսի Հայոց պատրիարքությունը ընդունել է Էրդողանի ցավակցությունը

Պոլսի Հայոց պատրիարքությունը Թուրքիայի վարչապետ Ռեջեփ Թայիփ Էրդողանի ուղերձի վերաբերյալ գրավոր հայտարարություն է տարածել: Էրդողանի հայտարարությունը բնորոշվել է ապագային միտված քայլ և հիմնաքար Հայաստանի և Թուրքիայի ժողովուրդների միջև կամուրջ կառուցելու համար:

Հայտարարության մեջ նշվում է, որ Պոլսո հայոց պատրիարք Մեսրոպ Բ-ն հայ-թուրքական հարաբերությունների դրական առաջընթացի համար բազմիցս առաջարկել էր հայ-թուրքական սահամանին համատեղ հուշարձան կառուցել՝ որպես երկու ժողովուրդների միմյանց վշտերը կիսելու խորհրդանիշ:

«Թուրքիայի քաղաքացի հայերը հավատում են, որ կտեսնեն այն երջանիկ օրը, երբ Թուրքիայի և Հայաստանի ժողովուրդների վիշտը կթեթևանա, վերքը կբուժվի: Որպեսզի դա իրականանա, կարծում ենք՝ ճիշտ կլինի հրաժարվել թշնամանք սերմանող ատելության արտահայտություններից: Վարչապետի ցավակցությունը սիրով ընդունում ենք: Մեր հավատքի հնագույն կրոնական ավանդույթներին համապատասխան աղոթքով հիշում ենք զոհվածներին: Թող Աստված ընդունի մեր աղոթքները և վիրավոր սրտերը փշերից մաքրելով բերրի հող դարձնի, որտեղ կծաղկեն փոխադարձ սիրո, հարգանքի սերմերը»,- նշված է հայտարարության մեջ: