Թուրք-ամերիկյան առևտրա-արդյունաբերական պալատի նախագահ է ընտրվել ազգությամբ հայ Արետ Թաշչյանը

Տնտեսական06:59, 22 Ապրիլ 2014

Թուրք-ամերիկյան առևտրա-արդյունաբերական պալատի նախագահ է ընտրվել ազգությամբ հայ Արետ Թաշչյանը

Ամերիկայի Միացյալ Նահանգներում (ԱՄՆ) թուրք գործարարների հիմնած «Թուրք-ամերիկյան առևտրա-արդյունաբերական պալատի» (TACCI) նախագահ է ընտրվել 63-ամյա Արետ Թաշչյանը: Նա ազգությամբ հայ Թուրքիայի քաղաքացիներից է:

Այս մասին տեղեկացնող թուրքական «Հյուրրիյեթ» պարբերականը նշում է, որ Թաշչյանը «TACCI»-ի նախագահ է ընտրվել գործադիր խորհրդի 7 դեմ և 12 կողմ ձայների քվեարկության արդյունքներով: Առևտրա-արդյունաբերական նշյալ պալատը ստեղծվել է 2004 թվականին Նյու Յորքում` ստանալով «Թուրքիայի պալատների ու բորսաների միության» աջակցությունը:

Նպատակը եղել է թուրք և ամերիկացի գործարարների միջև համագործակցության խորացումը, ամերիկյան ներդրողներին Թուրքիայի տնտեսության մեջ ներգրավումը և ԱՄՆ-ում ներդրումներ կատարող թուրքական ընկերություններին աջակցության ցուցաբերումը:

Ծովային փոխադրումներով և նավերի ապահովագրությամբ զբաղվող Արետ Թաշչյանը այդ ոլորտի ամենահայտնի ֆիրմաներից «OMNI»-ի ամերիկյան ներկայացուցչությունում է աշխատում: Երկար տարիներ է, ինչ բնակվում է ԱՄՆ-ում: Թաշչյանն իրականացնում է նաև Թուրքիայի վարչապետ Ռեջեփ Թայիփ Էրդողանի որդուն` Բուրաք Էրդողանին պատկանող բեռնանավերի ապահովագրումը:

Ermenihaber.am