ERMENI HABER AJANSI

Թուրքիայում մարտ 30-ին կայացած տեղական ինքակառավարման մարմինների (ՏԻՄ) ընտրությունների ընթացքում տեղի են ունեցել բախումներ ու անկարգություններ, կիրառվել են  սառը զենքեր ու հրազեն: Բախումների հետևանքով,  ըստ որոշ տվյալների,  8 մարդ զոհվել է, մի քանի տասնյակը` վիրավորվել: Սպանությունները տեղի են ունեցել Հաթայ նահանգի Գյոլբաշը և Շանլըուրֆա նահանգի Յուվաջըք գյուղերի համայնքապետերի ընտրությունների ժամանակ: 

Երեկոյան, երբ ընտրատեղամասերը փակվել են և սկսվել է քվեաթերթիկների հաշվարկը, 35 նահանգնում անջատվել է էլէկտրաէներգիան: Բացի դրանից ընտրությունների մեկնարկից  հետո անհասանելի և դժվար հասանելի են եղել թուրքական մի շարք առաջատար լրատվական կայքեր, ինչպիսիք են «Ջիհան» գործակալությունը, «Զաման»-ը, «Թարաֆ»-ը , որոնք ընդդիմադիր կամ էլ գյուլենական են համարվում:

Թուրքական «Զաման» թերթը գրում է, որ  «Ջիհան» գործակալության անձնակազմի անդամները մի շարք վայրերում հարձակման են ենթարկվել, իսկ կայքը ընտրատեղամասերի բացվելուց անմիջապես հետո ենթարկվել է «Ddos» հարձակման, ինչպես Թուրքիայից, այնպես էլ արտերկրից:

Այս պահին «Ջիհանի» և «Զամանի» կայքերը հասանելի են, իսկ ահա «Թարաֆ» թերթի կայքը անհասանելի է: Կայքը գլխավոր էջում տեղադրված գրությամբ  ընթերցողներին տեղեկացնում է, որ վերջին մեկ շաբաթվա ընթացքում կայքը կազմակերպված հարձակման են ենթարկվում:

«Ժողովրդավարական ընտրություններից, լրագրությունից, ազատ մամուլից վախեցող ստորները այսօր ևս մեկ անգամ հարձակմում կատարեցին և կոտրեցին մեր կայքը: Կարծում են, որ հաջողության են հասել, սակայն պարտվել են: Եվս մեկ անգամ պարզ դարձավ, թե որքան են վախենում «Թարաֆից» և ազատ լրատվությունից: Մենք մեկ անգամ էլ ցույց տվեցինք, թե որքան ուժեղ ենք:

«Թարաֆ»-ին չեք կարող լռեցնել: Կարճ ժամանակ անց կրկին ձեր կողքին ենք»,- նշված է հայտարարության մեջ:

Ermenihaber.am