Քեսաբի դեպքերը` 1915-ի շարունակություն. թուրք հոդվածագիր

Հասարակական07:14, 28 Մարտ 2014

Քեսաբի դեպքերը` 1915-ի շարունակություն. թուրք հոդվածագիր

Ալ-Նուսրա զինված խմբավորման զինյալները մարտի 21-ին հարձակվեցին Թուրքիայի Հաթայ նահանգին սահմանակից սիրիական Քեսաբ հայաբնակ գյուղաքաղաքի վրա: Այս իրադարձությանն անդրադարձած թուրքական ընդդիմադիր «Թարաֆ» թերթի սյունակագիր Ջենգիզ Աքթարը շեշտում է, որ Սիրիա ներթափանցած վերոնշյալ զինված խմբավորումը, ըստ խոսակցությունների, թիկունքից Թուրքիայի աջակցությունն է ստանում: Պաշտոնական Անկարան արտգործնախարարության գրավոր հայտարարությամբ շտապեց պաշտոնապես հերքել Թուրքիայի կողմից ջիհադական գրոհայիններին աջակցելու մասին լուրերը:

«Մարտի 23-ին թուրքական օդուժը կործանեց Քեսաբի օդային տարածքում Ալ-Նուսրայի գրոհայինների դեմ պայքարող սիրիական օդուժի մարտական ինքնաթիռը»,- նշում է Աքթարը և հավելում, որ թուրքական իշխանություններն աղմուկ բարձրացրին, թե օդային սահմանի խախտում է տեղի ունեցել, դրա համար էլ հարված են հասցրել սիրիական ինքնաթիռին:

Դարձյալ հարվածի տակ հայտնվեց քեսաբահայության կյանքի ու գույքի անվտանգությունը: Հոդվածագիրը հիշեցնում է, որ ցեղասպանություն վերապրած և ժամանակին Քեսաբում ապաստանած հայերը 1939 թվականին, երբ Թուրքիան անեքսիայի ենթարկեց Քեսաբը, արտագաղթելով մի կերպ փրկվեցին, բայց ունեցվածքի մեծ մասը թողեցին թուրքերին:

«Ու հիմա էլ,- գրում է թուրք հեղինակը,- Քեսաբի հայերը զանգվածաբար լքում են գյուղաքաղաքը և ապաստանում Լաթաքիայում: Աշխարհասփյուռ հայերը քեսաբահայերին պատուհասած աղետը և կործանված սիրիական ինքնաթիռը դիտում են որպես 1915 թվականի շարունակություն:

Ermenihaber.am