Ազգային փոքրամասնությունները Թուրքիայի կուսակցությունների ուշադրության կենտրոնում

Հասարակական10:49, 27 Մարտ 2014

Ազգային փոքրամասնությունները Թուրքիայի կուսակցությունների ուշադրության կենտրոնում

Թուրքիայում մարտի 30-ին տեղի են ունենալու տեղական ինքնակառավարման մարմինների (ՏԻՄ) ընտրությունները: Այս ընտրություններում Թուրքիայի ազգային փոքրամասնություններն ավելի գործուն մասնակցություն ունեն, իսկ քաղաքական կուսակցություններն էլ ավելի լուրջ հետաքրքրություն են ցուցաբերում նրանց նկատմամբ:

Այս մասին գրում է թուրքական «Հաբեր X» լրատվական կայքը՝ հղում կատարելով գերմանական «Դոյչէ վելլե» պարբերականին:

Հայկական համայնքի ամենահին տպագիր օրգաններից «Ժամանակ» թերթի խմբագիր Արա Գոչունյանը հայտնել է, որ մարտի 30-ի ընտրությունները ժողովրդավարության տեսանկյունից շատ կարևոր են, ազգային փոքրամասնություններին լուրջ ուղերձներ են հղվում: «Տարբեր կուսակցությունների ներկայացուցիչներ այցելում են պատրիարքարան, համայնքի կառույցներ և մամուլի գրասենյակներ: Այս կերպ քաղաքական կուսակցությունները դրական մոտեցում են ցուցաբերում»,- ասել է Գոչունյանը: Վերջինս գերմանական թերթին հայտնել է, որ կուսակցություններն այն բնակավայրերում, որտեղ փոքրամասնություններն ավելի խիտ են բնակեցված, յուրաքանչյուր համայնքից թեկնածուներ են առաջադրում:

«Սա ներգրավվածության և քաղաքացիական գիտակցման տեսանկյունից չափազանց դրական ենք գնահատում: Հիմնադրամների նկատմամբ դրական մոտեցումները համայնքի հիմնական պահանջներից մեկն է»,- ընդգծել է Գոչունյանը:

Ermenihaber.am