Վանում որպես խոտի, փայտի, գոմաղբի պահեստարան օգտագործվող հայկական եկեղեցին պետական պահպանության տակ կառնվի

Հասարակական10:31, 13 Մարտ 2014

Վանում որպես խոտի, փայտի, գոմաղբի պահեստարան օգտագործվող հայկական եկեղեցին պետական պահպանության տակ կառնվի

Վանի նահանգի Չաթաք շրջանի Քորլու գյուղի տարածքում գտնվող երբեմնի հայկական եկեղեցին, որն այսօր օգտագործվում է որպես խոտի, փայտի, գոմաղբի պահեստ, պետական պահպանության տակ կառնվի:

Թուրքական «Հաբեր3» լրատվական կայքի տեղեկացմամբ` Վանի մշակույթի և զբոսաշրջության վարչության տնօրեն Մուզաֆֆեր Աքթուղը եղեկեցու ներկայիս վիճակի մասին լուրերը լսելուց հետո հանձնարարել է Վանի մշակութային հուշարձանների պահպանության խորհրդի տարածքային վարչության 5 անդամներին ուսումնասիրություն կատարել ու զեկույց պատրաստել եկեղեցու վիճակի մասին:

«Մշակութային հուշարձաննրի պահպանության տարածքային վարչության առաջին իսկ ժողովում կքննարկվի այս եկեղեցու հարցը: Եկեղեցին նախ կմաքրեն, ապա կհաշվառվի ու կպարզվի, թե որ թվականին է կառուցվել: Եթե վերանորգման կարգի լինի, կվերանորոգվի: Սրանով մենք ներդրում կունենանք զբոսաշրջության զարգացման գործում»,-ասել է Աքթուղը:

Ինչպես ավելի վաղ տեղեկացրել էինք, այս եկեղեցին նախկինում 5 տարի ծառայել է որպես դպրոց, իսկ այնուհետև` հնձված խոտի պահեստարան և ոչ միայն: Տեղի մահեմդական բնակիչները հայկական եկեղեցին այժմ օգտագործում են նաև փայտանյութ և կենդանական գոմաղբ պահեստավորելու նպատակով: Եկեղեցին քիչ-քիչ ավերակվում է և գտնվում ոչնչացման վտանգի տակ, մի մասն արդեն փլուզվել է:

Ermenihaber.am