ERMENI HABER AJANSI

Թուրք իշխանավորները կամ իշխանական «Արդարություն և զարգացում կուսակցությանը» (ԱԶԿ-AKP) մոտ կանգնած մարդիկ հաճախ են պաշտոնապես և հրապարակավ ատելություն պարունակող խոսքեր հնչեցնում: Այս հարցով մտահոգվել է ընդդիմադիր «Ջումհուրիյեթ» թերթի սյունակագիր Էմրե Քոնգարը: Իր հոդվածում հեղինակը նկատել է տալիս, որ նման խոսքերը ոչ միայն հակասում են հումանիզմին, այլ նաև օրենքներին: Հետևաբար նման կերպ արտահայտվողները օրենք են խախտում ու հանցանք գործում: Հոդվածում բերվում է վերջին թարմ օրինակը:

Մարտի 8-ին Թարսուսում կազմակերպված հանրահավաքի ժամանակ Թուրքիայի էկոնոմիկայի նախկին նախարար Զաֆեր Չաղլայանը, անդրադառնալով կոռուպցիոն սկանդալի թեմային ասել էր, որ հրեայից, աթեսիտից կամ զրադաշտից վատ արարք կարելի է սպաել, իսկ ահա մահմեդականի դեպքում դա ցավալի է:

Հոդվածագիրը հիշեցնում է, որ 2013-ի ամռանը Գեզիի ցույցերի ժամանակ նման բնույթի ատելության խոսքեր ասել էր նաև Յըլդըզի տեխնիկական համալսարանի պրոֆեսոր Ահմեթ Աթանը: Նա թվիթեր միկրոբլոգի իր էջում գրել էր. «Գեզիի ցույցերում ձեր ակտիվ դերին ըմբռնումով եմ մոտենում եթե հրեա եք, հայ կամ հույն: Խնդրեմ մի հատ ուսումնասիրեք ձեր արմատները»:

Իսկ թուրք ըմբիշ Ռըզա Քայաալփը  գրել էր. «Հրապարակը թողել եք հայերին, ալլահը ձեզ փորձանքի բերի, ակտիվիստ ավազակներ»: Այդ մարզիկը իշխանության պարգևին է արժանացել, մրցաշարերի ժամանակ նրան պատիվ է վերապահվել քայլերթի ժամանակ առաջ տանելու թուրքական դրոշը:

Հոդվածի հեղինակը ցավով նշում է, որ այդ ամենը գալիս է վարչապետ Ռեջեփ Թայիփ Էրդողանից, ով ինքն էլ բազմիցս հնչեցրել է ատելություն պարունակող խոսքեր, որոնք այնքան շատ են, որ թվարկել հնարավոր չէ:

Էմրե Քոնգարը եզրակացնում է, որ թուրքական իշխանությունները որքան թուլանում են, որքան կորցնում են իրենց կշիռը, այնքան ավելացնում են ատելության հռետորաբանությունը` դրանով թշնամացնելով հանրության տարբեր հատվածներին ու անարգելով ժողովդրավարությունը:

Ermenihaber.am