Թուրք վերլուծաբան. «Օջալանն ինչ ասեց, այդ էլ եղավ»

Տարածաշրջան09:09, 25 Փետրվար 2014

Թուրք վերլուծաբան. «Օջալանն ինչ ասեց, այդ էլ եղավ»

Թուրքիայի Իմրալը կղզում ցմահ բանտարկված քրդերի առաջնորդ Աբդուլլահ Օջալանի մեկ տարի առաջ հնչեցրած խոսքերն այսօր իրականություն են դարձել: Նման տեսակետի հրապարակումով է հանդես եկել թուրք անվանի վերլուծաբան Ջան Դյունդարը: Թուրքական «Քեմալիստլեր» կայքում լույս տեսած հոդվածում հեղինակը պատմում է, որ հիմա, երբ հետահայաց նայում է 2013 փետրվարի 23-ին «Միլլիյեթ» օրաթերթում տպագրված Օջալանի հանդիպման արձանագրության տեքստը, զարմանալիորեն բացահայտում է, որ քուրդ առաջնորդի ասածները մեկ առ մեկ համընկնում են ներկայիս իրականությանը:

Դյունդարը հիշեցնում է, որ զուգահեռ պետության մասին առաջինը խոսել է Օջալանը` ասելով. «Թուրքիայում աշխատանք են տանում երեք զուգահեռ պետություններ. Միջամտություն ունեն ԱՄՆ-ի հրեական, հայկական և հունական լոբբիստական ուժերը: Նրանք սողոսկել են լրատվադաշտ, գործարար շրջանակներ և իհարկե «Արդարություն և զարգացում» կուսակցություն: Մնացել է միայն «Թուրքիայի ազգային հետախուզական կազմակերպություն»-ը (MIT): Ցանկանում են տապալել MIT-ի ղեկավարին` Հաքան Ֆիդանին»:

Հոդվածագիրը նկատել է տալիս, որ շաբաթներ առաջ գրեթե նույն միտքն արդեն որպես փաստ և իրականություն հայտնել է Թուրքիայի վարչապետ Ռեջեփ Թայիփ Էրդողանը:

Օջալանը նաև նշել էր, որ MIT-ին հարված հասցնելու ծրագիր կա: Եթե դա հաջողվի, ապա Թուրքիայում շատ «ամրոցներ» կխորտակվեն: «Եթե Ֆիդանը ձերբակալվի, հերթը կգա վարչապետին»:

Քրդերի առաջնորդը գյուլենական համայնքի մասին խոսելիս շեշտել է դրա ամերիկակենտրոն լինելը: «Ինձ այստեղ` Իմրալը, բերեցին, Գյուլենին էլ ԱՄՆ-ն վերցրեց: Գյուլենականներն աշխարհի 120 երկրում դպրոց են բացել: Որտեղի՞ց այդքան գումար»: Դյունդարը նկատել է տալիս, որ այսօր այդ նույն հարցը բարձրացնում է արդեն Էրդողանը:

Սահմանադրական բարեփոխումների վերաբերյալ Օջալանը վստահեցրել էր, որ ընդդիմադիր «Ժողովրդահանրապետական» և «Ազգայնական շարժում» կուսակցությունները փորձելու են խոչընդոտել այդ բարեփոխումներին: Դյունդարը 1 տարվա հեռվից արձանագրում է, որ այդպես էլ եղավ:

Ermenihaber.am