Թուրք գործիչ. «Քուրդիստան» անվան տակ ցանկանում են ստեղծել 2-րդ Իսրայելը»

Տարածաշրջան09:30, 07 Փետրվար 2014

Թուրք գործիչ. «Քուրդիստան» անվան տակ ցանկանում են ստեղծել 2-րդ Իսրայելը»

«Թուրքիայի աշխատավորական կուսակցության» նախագահ Դողու Փերինչեքը հանդես է եկել ծավալուն մի հոդվածով, որտեղ ահազանգում է Թուրքիան մասնատելու և ստրկացնելու արևմտյան ծրագրի մասին:

«Քեմալիսթլեր» կայքում հրապարակված «Միացումը կազատագրի, բաժանումը կստրկացնի» վերտառությամբ հոդվածում Փերինչեքը նշում է, որ ժողովրդավարության անվան տակ ամերիկյան իմպերիալիստական ուժերը տարածաշրջանի պետությունները մասնատելու դավադիր ծրագիր են փորձում իրականացնել: Իրաքը, Սիրիան թիրախավորելուց հետո, ըստ Փերինչեքի, հերթը հիմա հասել է Թուրքիային: Ավելի մասնավորեցնելով իմպերիալիստական ուժեր հասկացությունը` հեղինակը մատնանշում է ԱՄՆ-Իսրայել շահագրգիռ զույգին, որի կազմած վերոնշյալ ծրագրի իրականացմանը նպաստում են թուրքական իշխանության առաջին դեմքերը և քրդերի բանտարկյալ առաջնորդը:

«Թայիփ Էրդողանը, Աբդուլլահ Գյուլը, Հաքան Ֆիդանը և Աբդուլլահ Օջալանը նշածս ծրագրի գլխավոր դերակատարներն են` կապիտուլացիայի քառյակը»,- գրում է Փերինչեքը` հավելելով, որ արդեն եկել է նրանցից ազատվելու ժամանակը: Ըստ նրա` սկսյալ 1999 թվականից Թուրքիայի ազգայնական ուժերը իսրայելա-ամերիկյան ծրագիրը տապալելու գործին են լծված: Իսկ այդ ծրագիրը կրում է «Մեծ Մերձավոր Արևելք» անունը:

«Նախատեսվում է թուրք ժողովրդին պառակտել, պետությունը մասնատել և իսկ վերջում էլ «Քուրդիստան» անվան տակ ստեղծել 2-րդ Իսրայելը»,- նշում է Փերինչեքը և Թուրքիայի ճակատագրով մտահոգ հայրենակիցներին միասնական պայքարի կոչ անում:

Ermenihaber.am