Թուրքիայի փոխվարչապետը մեկնաբանել է հայկական հարցով զբաղվողների համարակալման մասին խոսակցությունները

Տարածաշրջան07:52, 06 Փետրվար 2014

Թուրքիայի փոխվարչապետը մեկնաբանել է հայկական հարցով զբաղվողների համարակալման մասին խոսակցությունները

Թուրքիայի փոխվարչապետ Բյուլենթ Արընչը պատասխանել է Թուրքական պատմագիտական ընկերության (ԹՊԸ) կողմից հայկական հարցի վերաբերյալ ուսումնասիրություններ կատարող գիտական աշխատողների տվյալների հավաքագրման մասին խոսակցություններին:

Ըստ թուրքական «Սաբահ» օրաթերթի՝ Արընչը հերքել է մամուլում շրջանառվող վարկածներն առ այն, որ ԹՊԸ-ն հայկական հարցով զբաղվողների համարակալում է իրականացնում: Վերջինիս խոսքով ԹՊԸ-ն իր գործառույթներից բխող աշխատանքներ է պատրաստում Թուրքիայի և Թուրքիայի պատմության վերաբերյալ, ինչի շրջանակներում ներառվում են նաև հայերի մասին աշխատանքներ:

Արընչը, հիշեցնելով որ, ԹՊԸ-ի կողմից պատրաստվում է «Թուրք-հայկական հարաբերությունների ժողովածու» վերնագրով աշխատություն, ասել է. «Մի քանի հատորանոց աշխատության շրջանակներում նախատեսվում է տարբեր տեսանկյուններից քննության առնել հայ-թուրքական հարաբերությունները: Հաշվի առնելով նման աշխատության պատրաստման դժվարությունն ու ժամանակատարությունը՝ կարիք է առաջացել այդ հարցով տարբեր ուսումնասիրողների կողմից հեղինակած գիտական հիմք ունեցող հոդվածները ևս օգտագործել : Հեղինակների հետ կապ հաստատելու նպատակով է Բարձրագույն կրթական խորհրդից պահանջվել ներկայացնել վերջինների տվյալները»: