Թուրք նախարար. «Զբոսաշրջիկների թիվը կհասցնենք 50 միլիոնի և կունենանք 50մլրդ դոլար եկամուտ»

Տնտեսական08:39, 25 Հունվար 2014

Թուրք նախարար. «Զբոսաշրջիկների թիվը կհասցնենք 50 միլիոնի և կունենանք 50մլրդ դոլար եկամուտ»

Թուրքիայի մշակույթի և զբոսաշրջության նախարար Օմեր Չելիքը հայտնել է իր ղեկավարած գերատեսչության առաջիկա գլխավոր նպատակը, այն է` մուտք գործել աշխարհի այն երկրների լավագույն հնգյակի մեջ, որոնք ամենից շատն են արժանանում զբոսաշրջիկների այցերին:

Նախարարը հիշեցրել է, որ 2002-ի ցուցանիշներով աշխարհում ամենաշատ թվով զբոսաշրջիկներ ընդունած երկրների ցանկում Թուրքիան զբաղեցրել էր 17-րդ տեղը: Այժմ արդեն բարելավել է իր դիրքերը և առաջխաղացում ունեցել մինչև 6-րդ տեղը:

Ըստ թուրքական «Միլլիյեթ» օրաթերթի` նախարար Չելիքը հայտնել է, որ չնայած տարածաշրջանային ճգնաժամին` 2013-ին Թուրքիայում արձանագրվել է 10 տոկոս աճ զբոսաշրջության ոլորտում: Նշել է նաև, որ աշխատանքները շարունակվելու են ոչ միայն ծովափնյա տուրիզմի զարգացման համար, այլ նաև ուշադրություն է հատկացվելու առողջարարական, մշակութային, սպորտային, կրոնական զբոսաշրջության վրա:

2012 թվականին Թուրքիա է մեկնել 31 մլն 782 հազար 832 զբոսաշրջիկ: 2013-ին նրանց թիվն ավելացել է 9.84 տոկոսով` հասնելով 34.910.098-ի: Եվրոպայից այցելած զբոսաշրջիկները կազմում են 18.7 մլն, առաջին տեղում գերմանացի տուրիստներն են (5 մլն):

Թուրքիայի մշակույթի և զբոսաշրջության նախարարը հայտարարել է, որ նպատակ ունեն զբոսաշրջիկների թիվը հասցնել տարեկան 50 միլիոնի և ունենալ 50մլրդ դոլար եկամուտ:

Ermenihaber.am