Վատերին մաքրել ենք մեր շարքերից. Էրդողանը կոռուպցիոն սկանդալի մասին

Տարածաշրջան15:09, 25 Դեկտեմբեր 2013

Վատերին մաքրել ենք մեր շարքերից. Էրդողանը կոռուպցիոն սկանդալի մասին

«CNN Turk»-ի հաղորդմամբ՝ Թուրքիայի վարչապետ, Արդարություն և զարգացում կուսակցության առաջնորդ Ռեջեփ Թայիփ Էրդողանը ելույթ է ունեցել կուսակցության ընդլայնված կազմով նիստին: Էրդողանը ելույթում անդրադարձել է Թուրքիայում տեղի ունեցած կոռուպցիոն սկանդալին: Ելույթի առավել ուշագրավ հատվածները ստորև.

«ԱԶԿ-ն ապօրինությունների վրա աչք չի փակում, դրանց նկատմամբ հանդուրժողականություն չի ցուցաբերում, քանի որ դրա համար անհրաժեշտ հողը մաքրված է: ԱԶԿ-ն առաջ է շարժվում կաթի պես սպիտակ կազմով: Մենք խիստ ուշադրություն ենք դարձնում մեր շարքերին և չենք հանդուրժում, որ որևէ բիծ լինի այդ շարքերում: Մեր վատերին հեռացրել ենք մեր միջից, որպեսզի մեր շարքերը ճեփ-ճերմակ մնան:

Համբերատարությամբ սպասում ենք, որ իրենց անունները կմաքրեն ու կվերադառնան նրանք, որոնց նկատմամբ զրպարտություն է իրականացվել: Ժողովուրդը թող վստահ լինի մեզ վրա: Մենք շարունակելու ենք լավն ու վատը իրենց անուններով կոչել: Մենք հաշվետու ենք ժողովրդի առջև և մեր յուրաքանչյուր քայլն անում ենք այդ գիտակցությամբ: Մենք իշխանության ենք եկել ու 11 տարի շարունակում ենք մնալ իշխանության մեր շիտակության, ապօրինությունների դեմ ունեցած խիստ, վճռական ու անհողդողդ կեցվածքի շնորհիվ:

2013-ին մենք բոլորից տարբեր մայիս ամիս ունեցանք. ամբողջ աշխարհում շարունակվող ֆինանսական ճգնաժամի պայմաններում մայիսին մենք աշխարհում նախադեպը չունեցող հաջողություններ ունեցանք: Սա պետք է միշտ մեր աչքի առաջ ունենանք, քանի, որ ուզում եմ հատուկ շեշտել, որ այս գործողությունների (հակակոռուպցիոն օպերացիա) մասշտաբները միայն մեր երկրով չեն սահմանափակվում: Եվ այս դեպքերը միջազգային ուղղորդում ունեն:

Այս դեպքերին չպետք է մակերեսայնորեն նայել: Այս օպերացիայի պատճառը Թուրքիայի առաջընթացի գործում ԱԶԿ-ական կառավարության ունեցած առաջնային դերն է»:

Էրդողանն այս սկանդալը համեմատել է Գեզի այգու ցույցերի հետ . «Գեզիի դեպքերի սկսվելուն պես միջազգային լրատվամիջոցները ճամբարներ խփեցին Ստամբուլում ու Անկարայում: Տեղական լրատվամիջոցները, միջազգային լրատվամիջոցների հետ ձեռք ձեռքի տված, սկսեցին սևացնել Թուրքիան ամբողջ աշխարհում: Դա դավաճանություն էր պետության նկատմամբ, որն իրականացվում էր ամենաանխիղճ կերպով: Այդ ժամանակ մենք երկրի տնտեսության նկատմամբ մահափորձի ու պետական դավաճանության ականատես եղանք»:

Ermenihaber.am