Թուրքիան հյուսիսիրաքյան Քուրդիստանի հետ պատմական պայմանագիր է ստորագրել

Տնտեսական10:57, 29 Նոյեմբեր 2013

Թուրքիան հյուսիսիրաքյան Քուրդիստանի հետ պատմական պայմանագիր է ստորագրել

Թուրքական կառավարության և Իրաքի հյուսիսում գտնվող քրդական ինքնավարության միջև ստորագրվել է էներգետիկ ռեսուրսների աղբյուրներ փնտրելու պայմանագիր, որը թուրքական մամուլի բնորոշմամբ` պատմական է: Բացի դրանից այս շաբաթ Անկարայում կողմերի միջև ստորագրվել էր համաձայնագիր էներգակիրները միջազգային շուկա հասցնող խողովակաշարերի կառուցման վերաբերյալ:

«Նավթի և գազի սպառման հարցում արտաքին աշխարհից 90 տոկոսանոց կախվածություն ունեցող Թուրքիան մեծ կարևորություն է տալիս Իրաքի և հյուսիսային Իրաքի էներգակիրների աղբյուրներին»,- գրում է «Սի Էն Էն Թուրք» լրատվականը:

Նշվում է, որ Հյուսիային Իրաքի Քրդական ինքնավարության հետ էներգետիկ համագործակցության զարգացման միջոցով Թուրքիան նպատակադրվել է նվազեցնել տարեկան իր կատարած 60 մլրդ դոլարի էներգակիրների ներմուծման ծավալները:

Պաշտոնական Բաղդադը, արձագաքնելով թուրք-քրդական նշյալ համագործակցությանը, գոհունակություն է հայտնել որ նրանց միջև չի ստորագրվել նավթի արտահանման մասին պայմանագիր, քանի որ Իրաքի սահմաններում գտնվող նավթի և գազի պաշարները բոլոր իրաքցիներինն է ու քրդերը չեն կարող միանձնյա տնօրինել դրանց արտահանումը:

Ermenihaber.am