Թուրք հաքերները գրոհել են հայկական կայքերը` ի պատասխան արցախյան զորավարժությունների

Հասարակական07:25, 26 Նոյեմբեր 2013

Թուրք հաքերները գրոհել են հայկական կայքերը` ի պատասխան արցախյան զորավարժությունների

Թուրքական «Cyber-Warrior Akıncılar» հաքերների (համակարգչահեններ) խումբը հարձակում է իրականացրել որոշ հայկական կայքերի վրա: Ըստ թուրքական մամուլի` նման քայլով թուրք հակերների պատասխանել են Արցախում Պաշտպանության բանակի զորամասերից մեկում անցկացված այն ցուցադրական զորավարժությանը, որի ժամանակ հայ զինվորներն ուժային հնարքով կոտրել են թուրքական և ադրբեջանական դրոշների պատկերներով աղյուսներ:

Թուրքական «Հաբերա» լրատվական կայքի տեղեկացմամբ` հաքերների գրոհի թիրախ են դարձել ավելի քան 100 հայկական կայքեր, այդ թվում և ՀՀ Ազգային ժողովի պաշտոնական կայքը:

Հակերները կայքերի առաջին էջում տեղադրել են բանաստեղծ Մեհմեթ Աքիֆ Էրսոյի և գրականագետ Միթհաթ Ջեմալ Քունթայի բանաստեղծություններից որոշ հատվածներ, որոնք նվիրված են թուրքական դրոշի փառաբանմանը:

Հաքերների վերոնշյալ խումբը նախազգուշացրել է, որ ով անարգի Թուրքիայի դրոշը, կստանա ավելի վատ պատասխան: «Նմանատիպ արարքները միշտ մեր թիրախում են և շարունակելու են մնալ»,- ասված է խումբի հաղորդագրության մեջ:

Ermenihaber.am