ERMENI HABER AJANSI

Վերջին շրջանում Հայաստանի և Թուրքիայի միջև  հարաբերությունների կարգավորման հարցը կրկին օրակարգում է:
Գերմանական «Դոյչե վելլե» լրատվական  գործակալության  թուրքական ծառայությունը ուշադրություն է հրավիրում առևտրական հարաբերությունների կարգավորման նախանշանների վրա՝ նշելով, որ  Հայաստանը Թուրքիայի արտգործնախարար Ահմեթ Դավութօղլուին հատուկ հրավեր է հղել մասնակցելու «Սևծովյան տնտեսական համագործակցության» անդամ երկրների արտգործնախարարների  հերթական ժողովին, որն այս անգամ անցկացվելու է Երևանում:

Ըստ աղբյուրի՝  Հայաստանից ստացված հրավերը  երկու երկրների հարաբերությունները և հատկապես տնտեսական հարաբերությունները զարգացնելու  ուղղությամբ  հզոր ազդակ է:
«Թուրքիա- Հայաստան սահմանը փակ է և չնայած կան որոշակի արգելքներ, այնուամենայնիվ, երկու երկրների միջև առևտուրը շարունակում է սովորականի պես աճ արձանագրել»,-գրում է թերթը:
Թուրքիայի վիճակագրական ծառայության տվյալները ցույց են տալիս, որ 2012 թվականին Թուրքիայից Հայաստան կատարված արտահանումը նախորդ տարվա համեմատ աճ է գրանցել: 2011 թվականին Թուրքիայից Հայաստան կատարվել է  218 միլիոն դոլարի արտահանում, այնինչ 2012 թվականին այդ թիվը կազմել է 241 միլիոն դոլար:

2011 թվականին ընդամենը 2 ամիս է արտահանում կատարվել, 2012-ին՝ 4 ամիս  իրար հետևից: 2013-ը այս տեսանկյունից ավելի կայուն է: 2013-ի առաջին 4 ամիսների ընթացքում արտահանումները  կատարվել են  միմյանց բավականին մոտ ժամանակային կտրվածքով:

Թերթը, հաշվի առնելով վերոնշյալ վիճակագրական տվյալները, կարծում է, որ այդ տվյալները, չնայած սահամանփակումներին,  երկու երկրների միջև հարաբերությունները կարգավորելու նշաներ են:

«Թուրք-հայկական գործարարության զարգացման խորհրդի» համանախագահ Քաան Սոյաքի կարծիքով 2015 թվականը ազդեցություն չի ունենա այս ծավալի վրա, որը հիմնականում ձևավորվում է փոքր և միջին առևտրականների և արդյունաբերողների միջոցով:

Ըստ Սոյաքի՝ 2012 թվականին Թուրքիայի և Հայաստանի տնտեսական հարաբերությունների ծավաալները ոչ պաշտոնական տվյալներով եղել են շուրջ 300 մլն դոլար: Մեծ նշանակություն է  տրվում երկու երկրների միջև մեծածավալ ապրանքների և արդյուանաբերական արտադրանքների, ինչպես նաև այսպես կոչված ճամպրուկային առևտրին: Վերջինի ամենակարևոր վայրերից է համարվում Ստամբուլի Լալելի շրջանը, որտեղ հայ առևտրականները մշտական հաճախորդներ են: Ըստ ենթադրությունների՝ Հայաստանից եկող հաճախորդների մեծ մասը ճանապարհորդության սկզբում ամենաքիչը 10000 դոլարի ծախս է անում:

Ermenihaber.am