ERMENI HABER AJANSI

Թուրքիայի վարչապետ, իշխող «Արդարություն և զարգացում» կուսակցության (ԱԶԿ-AKP) ղեկավար Ռեջեփ Թայիփ Էրդողանը հաճախ է խոսում Թուրքիայի` որակապես նոր կարգի ու մակարդակի երկիր լինելու մասին: Այս երևույթի վրա է ուշադրություն հրավիրել թուրքական «Միլլիյեթ» պարբերականի սյունակագիր Մելիհ Աշըքը:

Նա հիշեցնում է վարչապետի խոսքերը. «Նոր Թուրքիան թուրքին, քուրդին, հույնին, չերքեզին, արաբին, վրացուն, լազին խաղաղության մեջ պահող երկիրն է: Մեր իշխանության օրոք վերջ է դրվել ասիմիլացիային: Մենք մեկ ազգ ենք` բոլոր այդ բազմազանություններով հանդերձ... մեկ ազգ, մեկ դրոշ, մեկ հայրենիք և մեկ պետություն»:

Հոդվածագիրը նշում է, որ իրենց մեկ ազգ անվանող Էրդողանն այդպես էլ կոնկրետ չի ասում, թե որն է այդ ազգի անունը: Աշըքը նկատել է տալիս, որ ազգային ինքնություների կամ ենթաինքնություններին անդրադառնալիս    Էրդողանը չի նշում, թե ինքը, որ ինքնության կրողն է:

«Ես թուրք եմ» արտահայտությունը մինչև օրս լսած չկանք նրանից: Քուրդը. Լազը, ամենքն իրենց ինքության մասին հպարտորեն են նշում: Իսկ Էրդողանն այդպես չի անում»,- գրում է թուրք սյունակագիրը:

Մեկ այլ ուշագրավ հանգամանք էլ է ընդգծում հոդվածի հեղինակը` վկայակոչելով իր գործընկերներից մեկի դիտարկումը: Բանն այն է, որ Էրդողանը երբ թվարկելիս է լինում Թուրքիայի ազգային փոքրամասնություններին, նրանց ինքնություննները, երբեք չի տալիս հայերի անունը ու չի հիշատակում հայկական ինքնության մասին: Աշըքը նույնիսկ զարմանք է հայտնում, թե Թուրքիայում աշխատող հայ լրագրողներին ինչպես չի անհանգստացնում այդ հանգամանքը, փաստորեն Էրդողանը հայերի ինքնությունը նույնիսկ ենթաինքնություն չի համարում:

«Այսինքն ասիմիլացիան վերջացել է ու հայեր չկա՞ն: Սրանով հետաքրքրվող ու այս մասին հարց տվող էլ չկա»:

Ermenihaber.am