Մարմարը Թուրքիայի «նավթն է»

Տնտեսական07:49, 12 Նոյեմբեր 2013

Մարմարը Թուրքիայի «նավթն է»

Հանքանյութերի արտահանման ծավալները 2023 թվականին 15 մլրդ դոլարի հասցնելու նպատակ ունեցող Թուրքիան մեծ հույսեր է կապում հատկապես հանքաքարերի իր ունեցած պաշարների հետ:

«Արդյունահանող գործարարների միության» նախագահ Էրոլ Էֆենդիօղլուն նշում է, որ մարմարի համաշխարհային պաշարների 30 տոկոսը գտնվում է Թուրքիայի տարածքում: Մարմարի արդյունահանության ցուցանիշով Թուրքիայում առաջին տեղը զբաղեցնում է իր մեծությամբ երկրի չորրորդ նահանգը հանդիսացող Բուրսան:

«Մարմարը Թուրքիայի նավթն է»,- ըստ թուրքական «Սաբահ» պարբերականի` կարծիք է հայտնել Էֆենդիօղլուն: Նրա տեղեկացմամբ` մարմարի արդյունահանությունը Թուրքիայում աշխատատեղ է ապահովում ավելի քան 200 հազար մարդու համար: Բուրսայի մարմարի մշակման արտադրամասերի տված արտադրանքն աստիճանաբար դառնում է աշխարհում լայնորեն ճանաչելի ապրանքանիշ:

Թուրքիայի տեքստիլ և ավտոարդյունաբերության ստվերում մնացած մարմարի սեկտորը, սակայն, մեծ մասնաբաժին է կազմում արտահանության ծավալներու: Օրինակ` նախորդ տարի հանքանյութերի արտահանությունը կազմել է 4 մլրդ դոլար, որից 2 մլրդ 100 մլն դոլարը բաժին է ընկել հանքաքարերի և մասնավորապես մարմարի վաճառքին:

Ermenihaber.am