ERMENI HABER AJANSI

Թուրքիայում տեղի է ունեցել մուսուլամանցված հայերի մասին կոնֆերանս, որտեղ, ի թիվս այլ հարցերի, ներկայացվել են նաև հայ կանանց պատմությունները: 

Այդ պատմություններից մեկն էլ, որը կոնֆերանսի ժամանակ պատմել է մտավորական Նևին Յըլդըզ Թեհինջիօղլուն, տեղ է գտել թուրքական «Թարաֆ» թերթում:

Սառան, ով  ապրում էր Շանլըուրֆայում (Եդեսիա), ստիպված է եղել ամուսնանալ իր ծնողներին սպանած թուրք Այըփ աղայի հետ, ով համիդիե գնդերի գլուխն անցած հարձակվում էր հայկական գյուղերի, բնակավայրերի վրա:

15-ամյա Սառայի գյուղի վրա էլ հարձակվում են և տղամարդկանց հավաքում, տանում:  Դեպքից մեկ ամիս անց , երբ Սառան ձորում  լվացք էր անում, շան բերանում  մարդու ձեռք է տեսնում, որի ժամաացույցից կռահում է, որ դա իր հորեղբոր ձեռքն է: Շան հետևից գնում է մինչև այսօր էլ «հայկական քարանձավ» կոչվող վայրը և այնտեղ իրենց գյուղի տղամարդկանց մասնատված մարմիններն է գտնում:

Ողջ մնացածները որոշում են  հեռանալ գյուղից, սակայն Այըփ աղան բռնում է նրանց և, օրեր շարունակ պահելով ինչ-որ պահեստում, սովի մատնում: Այըփ աղան, ով արդեն երկու կին ուներ, սիրահարվում է  Սառային և պահանջում է, որ իր հետ ամուսնանա: Երբ Սառան չի համաձայնում, Այըփը սպանում է նրա մորը, Սառան նորից չի ընդունում նրա առաջարկը, որից հետո աղան սպանում է նաև աղջկա հորը: Իսկ երբ Այըփը ուզում էր Սառայի եղբորը սպանելը, աղջիկը համաձայնում է 2 պայմանով՝ նախ եղբորը չպիտի սպանեին և երկրորդ՝ իր անունը, որը հայրն էր նրան տվել, չպիտի փոխվեր:

Այըփ աղան համաձայնում է, սակայն մեկ տարի անց Սառայի եղբայրը մահանում է կասկածելի հանգամանքներում: Իսկ Այըփ աղան սկսում է սարսափլի ճնշումների ենթարկել Սառային: Այըփը յաթաղանով, որով հարյուրավոր հայերի էր սպանել, Սառայի մարմնի վրա խաչեր էր գծում, բռնաբարում:  Սառան ունենում է 15 երեխա, որոնք բոլորն էլ մահանում են: Երեխաներին թունավորելով սպանել էր կամ Սառան, կամ էլ նրա մրցակիցը: 

Սառայի մահն էլ շատ ողբերգական էր: Երբ նա գերեզմանոց էր գնում, նրա բարեկամաները, որոնք չէին հավատում, որ Սառան մահմեդական է, հարձակվում են նրա վրա, թե եթե դու էլ մուսուլման ես, ապա նամազ արա: Սառան համաձայնելով մտնում է նամազ անելու, որից անմիջապես հետո ուղեղի կաթված է ստանում և մահանում:

Սառայի պատմությունը ավարտելուց հետո մտավորականը  հայտնել է, որ այս պատմության մեջ «վատերը»՝ Այըփ աղան էլ, այս պատմությունը իրեն պատմողներն էլ  իր բարեկամներին են եղել:

«Սխալ է, որ տուժածները գան և ասեն. «Մենք տուժել ենք»: Հանցագործները, երբ ասեն, մենք մարդասպան ենք, այդ ժամանակ անցյալի վերքերը կբուժվեն», - ասել է Նևին Յըլդըզ Թեհինջիօղլուն:

Ermenihaber.am