ERMENI HABER AJANSI

Թուրքիայի խոշոր քաղաքներում՝ Ստամբուլում, Անկարայում ու Բուրսայում Հանրապետության տոնը նշելու համար հավաքված քաղաքացիների գործողություններին միջամտել են ոստիկանները:

Թուրքական «Ջումհուրիյեթ»-ի տեղեկացմամբ՝ Բուրսայում, որտեղ այսօր նշվող հանրապետության տոնակատարություններին մասնակցել է  այդ երկրի աշխատանքի և սոցիալական ապահովության նախարար Ֆարուք Չելիքը, անախորժություն է տեղի ունեցել: Թուրքիայի երիտասարդական միության մոտ 100 անդամներ, մոտենալով քաղաքի Հեյքել թաղամասում տեղի ունեցող միջոցառման հրապարակին, սկսել են հակակառավարական կոչեր անել: Երիտասարդները, որոնց ձեռքին եղել է Աթաթուրքի նկարով պաստառներ ու պետական դրոշներ, հավաքված մարդկանց որոշ մասի կողմից աջակցություն ստանալով՝ կարճ ժամանակ երթ են կազմակերպել: Ոստիկանները, կտրելով նրանց ճանապարհը, փորձել են ցրել երթի մասնակիցներին, ինչի արդյունքում վերջիններիս ու ոստիկանների միջև կարճատև բախումներ են տեղի ունեցել:   

Ստամբուլի Բեյօղլու թաղամացում ևս Թուրքիայի երիտասարդների միության անդամները Բանվորական կուսակցության ներկայացուցիչների հետ միասին ցանկացել են երթ կազմակերպել Թունջել հրապարակում: Ոստիկանները փորձել են կանխել  երթը, ինչի ընթացքում «Մուստաֆա Քեմալի զինվորներն ենք» վանկարկող երիտասրդներից երկուսին ձերբակալել են: Իսկ Թաքսիմ հրապարակի մերձակայքում ոստիկանները պահպանության արտակարգ ռեժիմ են սահմանել: Մեծ քանակությամբ կուտակված ոստիկանական ուժերը արգելել են երթ անցկացնել ցանկացողներին, իսկ չենթարկվողներին՝ հակադրաբար ցրել:

Թերթի հաղորդմամբ՝ Ստամբուլի Քադըքյոյ թաղամասում դեռ շարունակվում է «Հանդիպում ենք նոր հանրապետության համար: Թուրքիան ԱԶԿ-ին գլուխ չի խոնարհում» խորագրով հանրահավաքը:

Ermenihaber.am