ERMENI HABER AJANSI

Օրեր առաջ ադրբեջանական մամուլում տարածվել էր տեղեկություն այն մասին, որ թուրքական առաջատար պարբերականներից մեկի` «Հյուրրիյեթ»-ի էլեկտրոնային տարբերակում բաժանորդագրության համար լրացվող տվյալների մուտքագրման պատուհանում նշված պետությունների ցանկում տեղ է գտել նաև Լեռնային Ղարաբաղի Հանրապետություն անվանումը: Ադրբեջանական մամուլը սա որակել էր որպես «Հյուրրիյեթ»-ի կողմից մեծ անարգություն` Ադրբեջանի տարածքային ամբողջականության նկատմամբ»:

Բանը հասել էր նույնիսկ նրան, որ Ադրբեջանի արտաքին գործերի նախարարությունը դիմել էր Բաքվում Թուրքիայի դեսպանատուն` փորձելով պարզաբանում ստանալ հարցի վերաբերյալ:
Թե դեսպանատանը ինչ պարզաբանում տվեցին Ադրբեջանի արտգործնախարարին, կամ առհասարակ տվեցին պարզաբանում թե ոչ  հայտնի չէ, սակայն այն, որ  թուրքական կողմը հերթական անգամ «ականջները կախեց» ադրբեջանական հիստերիայի առաջ ակնհայտ է: «Հյուրիյեթի» բաժանորդագրության համար լրացվող հայտից արդեն հանված է Լեռնային Ղարաբաղի Հանրապետության անվանումը:

Ուշագրավ է, որ  «Հյուրրիեյթը» դա արեց անաղմուկ, առանց որևէ հայտարարության ու բացատրության` հավանաբար, չցանկանալով թեմայի վերաբերյալ ավելորդ աղմուկ բարձրացնել: Ի տարբերություն «Հյուրրիյեթի»` ադրբեջանական կողմը գլխի չէր ընկել, որ ի լուր աշխարհի աղմկելուց առաջ կարելի էր պարզապես նամակ ուղարկել «Հյուրրիյեթի» խմբագրություն ու հայտնել վրդովմունքի մասին:

Ակնհայտ է, որ իր այս «լուռ» քայլով «Հյուրիյեթը» նպատակ ուներ խլացնել աղմուկը: Եվ այժմ երկու կողմն էլ լուռ են, Լեռնային Ղարաբաղի Հանրապետության անվանումը հեռացված է, բայց...

Հարգելի «Հյուրիյեթ» թերթի խմբագրություն `
Թեմայի վերաբերյալ ձեր պարզաբանումը բացի ադրբեջանցիներից հետաքրքրում է նաև ձեր շատ այլ ընթերցողների: Եթե ադրբեջանցիներին հետաքրքրում էր, թե ինչ գործ ունի ԼՂՀ անվանումը պետությունների շարքում, ապա մեզ հետաքրքրում է, թե ինչու այն այլևս չկա այդ ցանկում: Ի՞նչը կամ ո՞վ ձեզ ստիպեց հեռացնել ԼՂՀ անվանումը:

Թուրքիայի առաջատար պարբերականներից մեկը կարծում եմ ճիշտ կլինի, որ պատասխանի իրեն ուղղված մեղադրանքներին և իր ընթերցողների հարցերին, քանի որ որպես ձեր մշտական ընթերցող ես օրեր առաջ անդամագրվեցի «Հյուրրիյեթ»ի էլեկտրոնային տարբերակին`երկիրը նշելով ԼՂՀ, իսկ հիմա այդ նույն հայտում չեմ կարողանում գտնել ԼՂՀ անվանումը: Ինչու՞:

1.

2.


Աստղիկ Իգիթյան
Ermenihaber.am