ERMENI HABER AJANSI

Թուրքիայի առողջապահության նախարարության կողմից իրականացված  ուսումնասիրությունների արդյունքները ցույց են տալիս, որ Թուրքիայում բնակչության 71.9 տոկոսը ոչ ակտիվ կենսակերպ է վարում:

Այս մասին գրում է թուրքական «Հաբեր թուրք» լրատվական կայքը՝ հղում անելով բժիշկ Շենոլ Օքուրին: Վերջինս հայտնել է, որ նախարարությունը ֆիզիկական ակտիվության վերաբերյալ հասրակության  տեղեկացվածությունը բարձրացնելու նպատակով «Համաշխարհային քայլքի օր» խորագրով միջոցառումներ է կազմակերպել:

«6-11 տարեկան երեխաների 58.4 տոկոսը կանոնավոր կերպով վարժանքներ չի կատարում: Այս տարիքային խումբն օրվա մեջ միջինը 6 ժամ անշարժ անցկացնում  է  կամ հեռուստացույցի, համակարգչի առջև նստած,  կամ էլ  տնային հանձնարարությունները և աշխատանքները կատարելով»,- ընդգծել է մասնագետը:

Այս ամենի հետ միասին երկրում  գիրության, շաքարային դիաբեթի և սրտանոթային հիվանդությունների աճ է գրանցվել:
Բժիշկ Օքուրը նշել է, որ խրոնիկ հիվանդությունների ռիսկային գործոններից մեկն էլ հենց անշարժությունն է, որը աշխարհում ընդհանուր մահացությունների պատճառ դարձած գործոնների ցուցակում 4-րդ տեղն է զբաղեցնում:
Ֆիզիկական անգործությունը գիրության գլխավոր պատճառն է: Ենթադրվում է, որ կրծքի և հաստաղիքի քաղցկեղի 21-25 տոկոս, շաքարախտի 27 և սրտային հիվանդությունների 30 տոկոս դեպքերում պատճառը հենց անշարժությունն է:
Օքուրը հայտնել է, որ ֆիզիկական ակտիվությունը սովորություն դարձնելը խրախուսելու նպատակով առողջ սնվելու և ակտիվ կենսակեպ վարելու  ծրագիր է մշակվել՝ նշելով. «Ֆիզիկական ակտիվության բարձրացումը ոչ միայն առանձին անհատի, այլ ամբողջ հասարակության խնդիրն է : Այս իսկ պատճառով անհրաժեշտ է բազմավեկտոր, խիստ կարգապահ և մշակութային մոտեցում ցուցաբերել»:

Ermenihaber.am