Ֆուտբոլային դերբի և զանգվածային ծեծուջարդ Թուրքիայում (տեսանյութ)

Մարզական09:05, 23 Սեպտեմբեր 2013

Ֆուտբոլային դերբի և զանգվածային ծեծուջարդ Թուրքիայում (տեսանյութ)

Թուրքիայի ֆուտբոլի «Սուպեր լիգայի» խաղերից մեկը ավարտվել է զանգվածային ծեծկռտուքով: Տուրի կենտրոնական հանդիպման ժամանակ խաղադաշտ էին դուրս եկել Ստամբուլ քաղաքը ներկայացնող՝ «Բեշիքթաշ» և «Գալաթասարայ» ֆուտբոլային ակումբները: Ֆուտբոլային դերբիի ժամանակ ակնթարթորեն խաղադաշտը քաոսի է վերածվել: Խաղավարտի վերջին վայրկյաններին «Գալաթասարայ» ակումբի ֆուտբոլիստ, բրազիլացի պաշտպան Ֆիլիպե Մելոն հեռացվել է խաղադաշտից: Կարմիր քարտից հետո «Բեշիքթաշի» երկրպագուները տրիբունաներից իջել են խաղադաշտ: Այդ պահից խաղը դադարեցվել է, իսկ ֆուտբոլիստները և մրցավարները հեռացել են հանդերձարան:

Թուրքական «Դողալ հաբեր» լրատվական գործակալությունը անդրադարձել է վերոնշյալ դերբիին: «Բեշիքթաշ» ֆուտբոլային ակումբը առաջ է քաշել այն վարկածը, ըստ որի՝ վերոնշյալ միջադեպը նախօրոք կազմակերպված դավադրություն է եղել: Այս դեպքը լայն արձագանք է գտել նաև լրահոսում և սոցցանցերում:

Նշվում է, որ խաղի ժամանակ անվտանգության միջոցներ բավարար կերպ ապահովված չեն եղել: Երկրպագուներից մեկը նշել է. «Ոչ մի ֆուտբոլային հանդիպման այսքան հեշտ խաղադաշտ չեմ մտել: Նույնիսկ սև շուկայում վաճառված տոմսերը հավաքագրվում և վերավաճառվում էին: Հնարավոր է, նույնիսկ զենքեր էլ են բերվել խաղադաշտ»:

Բեշիքթաշ ֆուտբոլային ակումբի տնօրինությունը հավատացած է, որ միջադեպը դավադրության հետևանք է: Խաղի ավարտից հետո ակումբի ղեկավարությունը մարզադաշտում ժողով է հրավիրել: Ըստ Ժողովի մասնակիցներ՝ միջադեպը քաղաքական ենթատեքստ ունի: