ERMENI HABER AJANSI

Արգենտինայի մայրաքաղաք Բուենոս Այրեսում շարունակում են կախված մնալ գովազդային այն վահանակները, որոնք պարունակում են 2020թ. ամառային օլիմպիական խաղերը Ստամբուլում անցկացնելու դեմ ուղղված քարոզչություն: Թեև Միջազգային օլիմպիական կոմիտեն արդեն որոշում է կայացրել, որ Օլիմպիադան անցկացվելու է Տոկիոյում, բայց նշյալ գովազդային վահանակները դեռ չեն հանվել փողոցներից ու հրապարակներից: Այդ հանգամանքը մտահոգություն է առաջացրել թուրքական շրջանակներում, որոնք սկսել են մեղադրել հայկական սփյուռքին և լոբբիստական ուժերին հակաթուրքական քարոզչություն կազմակերպելու մեջ:

Թուրքական լրատվամիջոցները հայկական ձեռագիր են փնտրում արգենտինական այն ցուցապաստառների մեջ, որտեղ Թուրքիան ներկայացվում է որպես մարդու իրավունքները ոտնահարող երկիր:

«Հայերը մեծ աշխատանք են կատարել այն ուղղությամբ, որ Թուրքիան վարկաբեկող ցուցապաստառները տեղադրվեն Բուենոս Այրոսի տարբեր վայրերում: Նրանք խոչընդոտեցին Ստամբուլում օլիմպիական խաղերի անցկացմանը»,- գրում է թուրքական «Անկարահաբեր» կայքը:

Հիշեցնենք, որ ցուցապաստառներում պատկերված է թուրք ուժային, որը մահակով հետապնդում է օլիմպիական մարզիկին` հետևյալ մակագրությամբ. «Մարդու իրավունքները ոտնահարող երկրում օլիմպիադա չի կարող կազմակերպվել»:

Ermenihaber.am