ERMENI HABER AJANSI

Թուրքական «Ջումհուրիյեթ» օրաթերթի թղթակիցը զրուցել է իսրայելական հայտնի «Հաարեց» թերթի անվանի սյունակագիրներից Գիդեոն Լևիի հետ: Զրույցի թեման ձգվել է տարածաշրջանից մինչև Թուրքիա: Իսրայելցի փորձագետը նկատել է տվել, որ Թուրքիան առայժմ շարունակում է մնալ տարածաշրջանի միակ երկիրը, որը փորձում է իսլամն ու ժողովրդավարությունը «մի գծով քայլեցնել»:

Չնայած այն բանին, որ Թուրքիան համեմատաբար բարելավել է իր տնտեսական ցուցանիշները, որոշակիորեն զարգացրել է Միացյալ Նահանգների ու Արևմուտքի հետ իր հարաբերությունները, կարողացել է ձեռք բերել տարածաշրջանում ազդեցիկ խաղացողի կարգավիճակ, բայց, ըստ իսրայելցի փորձագետի, այդ ամենի վրա ստվեր է նետում թուրքական իշխանությունների անհանդուրժողական կեցվածքը մամուլի ազատության և այլակարծության նկատմամբ: Հատկապես մատնացույց է արվել Գեզիի խռովությունների ժամանակ ցուցարարների դեm թուրք ոստիկանների կիրառած անհամաչափ ուժն ու բռնությունները:

«Թուրքիան որոշակի խնդիրներ ունի ժողովրդավարության հետ կապված: Մի շարք լրագրողներ բանտերում են, որը չեմ կարողանում ոչ մի կերպ հասկանալ: Արտաքին աշխարհը, որը խրախուսում է Էրդողանի վարչակազմի ձեռքբերումները, մյուս կողմից էլ նաև ասում է` հապա մի խոսքի ազատության վիճակիդ նայիր: Թուրքական կառավարությունը թանկ է վճարում դրա համար հենց նույն արտաքին աշխարհի առաջ: Ընդհանրապես լրագրողներին բանտ ուղարկող առաջնորդները ժողովրդավարություն կառուցել չեն կարող: Մինչդեռ Էրդողանը դեռ շարունակում է ժողովրդականություն վայելող լիդեր մնալ, դրա համար էլ կարիք չի զգում շտկելու այդ վիճակը: Գալով այն հարցին, թե ինչու է իրեն այդպես պահում վարչապետը, չեմ կարողանում իմաստ տալ դրան: Ըստ իս` Էրդողանը կրակում է սեփական ոտքերին»,- նշել է հրեա վերլուծաբանը:

Վերջինս կատարյալ ապուշություն է համարել այն, որ թուրքական ոստիկանությունը ձերբակալում էր բողոքի զանգվածային ցույցերի ժամանակ «Twiiter» միկրոբլոգում այդ թեմայով ընդդիմադիր գրառումներ կատարողներին: Գիդեոն Լևիի համոզմամբ` ամեն կառավարություն մի թուլություն ունի, թուրքական կառավարության թուլությունն էլ բռնի ուժ ու միջոցներ կիրառելն է ընդդիմադիր զանգվածների նկատմամբ:

Ermenihaber.am