ERMENI HABER AJANSI

Թուրքական «Սթար» թերթի հոդվածագիր Էսեր Քարաքաշը անդրադարձել է Թուրքիայում սպասվելիք 2014-ի տեղական ինքնակառավարման ու նախագահական և 2015-ի համապետական ընտրությունների ու սահմանադրության հանրաքվեին ընդառաջ Թուրքիայի համար վտանգ հանդիսացող 3 հիմնական զարգացումներին:

1. Հոդվածագրի կողմից վտանգավոր որակավորված և ամենամեծ անդրադարձին արժանացած զարգացումները Հայոց ցեղասպանության 100 ամյա տարելիցի միջոցառումներն են: Քարաքաշն նշում է, որ 2015 թվականին` Հայոց ջարդերի 100 ամյակին Հայկական սփյուռքը անկասկած աննախադեպ ակտիվ գործողություններ կսկսի: Ըստ հոդվածագրի 2015-ին այնպիսի երկրների խորհրդարաններում Հայոց ցեղասպանության հետ կապված որոշումներ կնդունվեն, որ նույնիսկ Թուրքիայի մտքով էլ չի անցնում: Քարաքաշը անհանգստություն է հայտնում ԱՄՆ նախագահ Բարաք Օբամայի ապրիլքսանչորսյան  ամենամյա ուղերձի կապակցությամբ` նշելով որ շատ հնարավոր է, որ վերջինս փոխի ցեղասպանության հետ կապված տերմինաբանությունը ի վնաս Թուրքիայի:

Հոդվածագրի նշում է, որ պետք է հաշվի առնել նաև ցեղասպանության հետ կապված բոլոր այս զարգացումները  Թուրքիայում ազգայնական մտածելակերպի խորացման համար պարարտ հող կդառնան:

2. Որպես երկրորդ վտանգ նշվում է առաջիկա մի քանի տարիներին Թուրքիայի համար կանխատեսվող ցածր տնտեսական աճը:

3. Եվ որպես երրորդ վտանգ հոդվածագիրը կանխատեսում է 2015 թվականին մեծացող ազգայնական հոսանքն ու ցածր տնտեսական աճը  «Էրգենեքոնի ոգու» կողմից իր շահերին ծառայեցնելու հնարավորությունը:  

Եզրափակելով հոդվածը Քարաքաշը հարց է բարձրացնում թե արդյոք ինչ որ քայլեր կատարվում է այս 3 վտանգների ազդեցությունի նվազագույնի հասցնելու համար` նշելով, որ կարևոր են այն քայլերը, որոնց օգնությամբ փորձ պետք է կատարել հնարավորինս կանխել դրանք, սակայն ավելի կարևոր են այդ ուղղությամբ մշակվելիք երկարաժամկետ ծրագրերն ու խնդրին «ռազմաճակատից նայելը»:

Ermenihaber.am