«Ազգության կոդերի» հարցը` Թուրքիայի մեջլիսում

Հասարակական09:03, 05 Օգոստոս 2013

«Ազգության կոդերի» հարցը` Թուրքիայի մեջլիսում

Թուրքական «Թարաֆ» պարբերականը հայտնում է, որ թուրքական առաջատար թերթերի կողմից ոչ մուսուլմանների` մասնավորապես հույների, հայերի և հրեաների նկատմամբ կիրառվող «ազգության կոդի» բացահայտումից հետո պատկան մարմինները սկսել են արձագանքել:
Թուրքիայի Ներիքին գործերի նախարարությունը հայտարարություն է տարածել, որի մեջ ասվում է, որ քննարկման տեղիք տված կոդերը կիրառման մեջ են մտել Կրթության նախարարության համար:
Հայտարարության մեջ, որը խոստովանում է «ազգության կոդերի» կիրառման գոյությունը, ասվում է «Օսմանյան ժամանակաշրջանում բնակչության գրանցումներում առկա ազգերի կամ ռասաների մասին տեղեկություններից օգտվելով` մեր քաղաքացիների ազգության մասին տեղեկությունները փոխանցվում են Կրթության նախարարությանը»:

Իսկ «Ժողովրդահանրապետական» (ԺՀԿ-CHP) կուսակցության պատգամավոր Սեզգին Թանրըքուլուն հարցը մտցրել է ԹԱՄԺ-ի (Թուրքիայի ազգային մեծ ժողով) օրակարգ: Նա, անդրադառնալով ՆԳՆ հայտարարությանը, գրավոր հարցում է ուղարկել մեջլիս` պահանջելով վարչապետ Ռեջեփ Թայիփ Էրդողանի պատասխանը:
Պատգամավորի` Էրդողանին ուղղված հարցերը հետևյալն են. «Ինչու՞ են այդ կոդերը գաղտնի պահվել: Բնակչության հաշվառման մեջ առկա տեղեկությունները միայն Կրթության նախարարության կողմից օգտագործելու մասին տեղեկությունը կասկածելի չէ՞: Այս տեղեկությունները հասանելի՞ են անվտանգության, Ազգային հետախուզական ծառայության, ոստիականության, կադաստրի, դատախազության և դատարանների համար: Երբ Լոզանի պայամանագրում ոչ մուսուլմանների ծագման մասին տեղեկությունների գրանցման անհրաժեշտության մասին որևէ արտահայտության չկա, ո՞ր օրենքի կամ հրամանի հիման վրա է նման բան կիրառվում»:

Ermenihaber.am