ERMENI HABER AJANSI

Թուրքական «Զաման» օրաթերթում հրապարակվել է Մեհմեթ Ֆաթիհ Օզթարսուի հոդվածը, որտեղ նա անդրադարձել է հունիսի 5-8-ը Վրաստանի մայրաքաղաք Թբիլիսիում կայացած «Կովկասը կայսերական մթնշաղում» գիտաժողովին:

Հոդվածագիրը նշում է, որ քաղաքական, տնտեսական, մշակութային փոփոխությունները, որոնց ավելի քան մեկ դար դիմագրավել են Թուրքիան և հարևան երկրները, ճանապարհ են բացել այս տարածաշրջանում վերադասավորումների համար: Փոփոխությունները շարունակվում են ազգայնականության, էթնիկ խնդիրների և ազգային պետության կառուցման գործընթացով:

Այս  գործընթացը, քանի որ իր հետ բերել է բախումներ և պատերազմներ,  հեշտացրել է Օսմանյան կայսրության, Ռուսաստանի  և Իրանի պայքարի բեմահարթակում հայտնված ժողովուրդների միմյանցից օտարացումը: Ժողովուրդները, որոնք նախկինում համատեղ ապրելու գեղեցիկ մշակույթ էին ձևավորել, այսօր էլ հարյուրամյա փլուզումը հարթելու ուղղությամբ կարևոր է, որ մեկ սեղանի շուրջ հավաքվելով` փնտրեն միասնական խնդիրների լուծումները:

Այս կապակցությամբ Թբիլիսիի Պետական Համալսարանում հունիսի 5-8 ժամանակահատվածում տեղի  է ունեցել «Կովկասը կայսերական մթնշաղում» գիտաժողովը, որին մասնակցել են  Թուրքիայից, Ադրբեջանից, Հայաստանից, Վրաստանից և այլ երկրներից ժամանած բանախոսներ: Քննարկվել են բազմաթիվ թեմաներ Թուրքիայի թանզիմաթյան շրջանից մինչև հանրապետական ժամանակահատվածը տեղի ունեցած բարեփոխումները, սահմանադրության ընդունումը, տարբեր քաղաքական հոսանքների առաջացումը:

Ըստ հոդվածագրի` Հայկական հարցի քննարկումներն անցել են ժողովրդավարական մթնոլորտում, քանի որ բոլորն իրենց փաստարկներով կարողացել են ելույթ ունենալ, իսկ ցեղասպանություն եզրույթը կիրառողների և չկիրառողների համար ստեղծվել է միմյանց լսելու և հասկանալու գիտական հարթակ: Հայ գիտնականների ներկայությունը հոդվածագիրը փորձել է շահարկել թուրքական լույսի ներքո` նշելով որ նման կերպ հայերը ազատվում են սփյուռքի ճնշումներից և սեփական տաբուներից:

Ermenihaber.am