ERMENI HABER AJANSI

Երեկ երեկոյան Ստամբուլի Քազլըչեշմե հրապարակում տեղի է ունեցել Թուրքիայի վարչապետ Ռեջեփ Թայիփ Էրդողանի հրավիրած հանրահավաքը, որն անցկացվել է «Հարգանք ազգային իշխանություններին» կարգախոսով հանրահավաքների շրջանակում:

Թուրքական «Սաբահ» էլեկտրոնային լրատվականի տեղեկացմամբ՝  հանրահավաքի օրակարգի գլխավոր թեման եղել է Ստամբուլի Գեզի զբոսայգին:

Էրդողանը, դիմելով Գեզի այգու ցուցարարներին, ասել է, որ խնդիրը ոչ թե այգին է կամ նրա շրջակայքը, այլ՝ Թուրքիան: Անդրադառնալով սոցիալական մեդյային՝ ասել է, որ Թուրքիան այն երկիրը չէ, որին կարելի է սոցիալական մեդյայի միջոցով վիրահատել: 

Էրդողանի ելույթի  առավել ուշագրավ պարբերությունները ներկայացված են ստորև.

• «Թուրքիայի իրական պատկերը տեսնել ցանկացողներն այստեղ հավաքված են: BBC, CNN, Reuters, դե թաքցրեք այս հանրահավաքը: Օրեր շարունակ կեղծ լուրեր եք պատրաստել: Այս ժողովուրդը ձեր ներկայացրած ժողովուրդը չէ: Այս ժողովուրդը գիշերով թալան անող ժողովուրդ չէ:
• Այս պահին Թաքսիմ հրապարակը և Գեզի զբոսայգին դատարկվել են: Քաղաքապետարանը տարածքը մաքրում է, որպեսզի կանաչապատի: Իրական բնապահպաններն  այս պահին իրենց գործն են անում այնտեղ:
•   Զգուշացնում եմ. կրկին կոչեր են հնչում: Խնդրում եմ մի ՛ մտեք այդ խաղի մեջ: Խնդիրը Գեզի այգին չէ. նախ կուսակցությանս կենտրոնական շենքի վրա զինված հարձակում կազմակերպեցին, այնուհետև Ռեյհանլըյում 53 եղբայրներիս զոհ դարձրին, այս դեպքերն էլ շղթայի վերջին օղակն են: Թիրախը Թուրքիան է: Ժամանակն է, որ ցույցերի մեջ ներգրավված մեր եղբայրներն էլ դա հասկանան:
• Թուրքիան միայն Թաքսիմ հրապարակը չէ, Թուրքիան Քասըմփաշան է, Ֆեթիհն է, Էրզրումն ու Տրապիզոնն է: Ոչ ոքի լարած թակարդներն ու խաղերը մեզ չեն կարող վնասել, 2014 թվականի մարտին տեղի ունենալիք ընտրությունները նրանց հօդս կցնդեցնեն:
•  Եվրոպական խորհրդարանը որոշում է ընդունել… Եվրախորհրդարանը թող իր չափը ճանաչի: Նա արդյո՞ք Թուրքիայի հետ կապված որոշումներ ընդունելու իրավունք ունի: Թուրքիան այս պահին ԵՄ անդամ չի, այլ միայն բանակցող է: Որոշ լրատվանիջոցներ արդեն այս երկրում իրենց ուզած իշխանություներն  էին հիմնում: Ամեն ինչ շատ պարզ է: Թաքսիմում ուղարկված երեսուն հազար օրապահիկների մասին էլ գիտենք: Եթե մենք հաշիվ չպահանջենք, ժողովուրդը մեզնից հաշիվ կպահանջի:
• Մեզ հետ հանդիպման եկածները մեզ ասեցին՝ որտեղ ուզենանք պիտի կարողանանք ցույց կազմակերպել, ես էլ պատասխանեցի, որ այս երկիրը ճանապարհի  քարվանսարա չի:
•  Դիմում եմ ազգայնականներին: Հե ՛յ ԺՀԿ (Ժողովրդահանրապետական կուսակցություն) և կողմնակիցներ, ինչպե՞ս կարող եք ահաբեկիչի դեմքով Աթաթուրքի նկարի ու Թուրքիայի դրոշի հետ կողք կողքի քայլել: Մեր վրա եք հարձակվում, Եվրոպայից  էլ ասում են, թե ազատություն է:
• Այդ այգին ոչ այն օկուպացրածներինն է, ոչ էլ անկեղծ զգացումներով այնտեղ գտնվող երիտասարդներինն է: Ասում են` վրան ենք խփել: Ես էլ ասում եմ, որ այդտեղ չեք կարող վրան խփել, վրան խփելու տեղը հայտնի է: Յայլաները շատ են, գնացե ՛ք այնտեղ խփեք, սա ձեր սեփականությունը չի:
• Եթե ուզում եք այս իշխանությանը հեռացնել, ճանապարհը պարզ է՝ 2015-ին ընտրություններ:
• Մենք ոստիկանության արած սխալները, եթե կան այդպիսիք, կհետաքննենք, սակայն ոստիկանների վրա հարձակումների, մասնավոր սեփականությանը վնաս հասցնելու և լրատվամիջոցներին սադրելու դեպքերն էլ ենք քննության առնելու:
• Թուրքիայի դրոշները հանկարծ չծալեք ու որևէ տեղ դնեք: Ուզում եմ, որ այդ դրոշները կախեք ձեր պատշգամբներից: Սա դրոշի արշավ է»:

Նշենք, որ հանրահավաքը եղել է բավական բազմամարդ: Մասնակցելու համար մարդիկ Ստամբուլ էին ժամանել երկրի տարբեր շրջաններից:

Ermenihaber.am