Գեզի զբոսայգու ճակատագիրը որոշելու համար Էրդողանի կուսակցությունը մտադիր է հանրաքվե անցկացնել

Հասարակական06:51, 13 Հունիս 2013

Գեզի զբոսայգու ճակատագիրը որոշելու համար Էրդողանի կուսակցությունը մտադիր է հանրաքվե անցկացնել

Երեկ Թուրքիայի վարչապետ Ռեջեփ Թայիփ Էրդողանը Գեզի զբոսայգու դեպքերի կապակցությամբ հանդիպում է ունեցել 11 հոգուց բաղկացած պատվիրակության հետ:

Թուրքական «Ռադիքալ» պարբերականը տեղեկացնում է, որ հանդիպումից հետո «Արդարություն և զարգացում կուսակցության» (ԱԶԿ-AKP) փոխնախագահ և խոսնակ Հուսեյին Չելիքը մամուլի ասուլիսի ժամանակ հայնտել է, որ հանրաքվեի հարցը, որպես այլընտրանք, կքննարկվի կուսակցության ղեկավար խորհրդում և կներկայացվի կառավարությանը: Չելիքը տեղեկացրել է, որ հանրաքվեն կընդգրկի կամ ամբողջ Ստամբուլ քաղաքը կամ կսահմանափակվի միայն Բեյօղլուի թաղամասով:

«Ռադիքալ»-ը ներկայացրել է նաև այդ որոշման նկատմամբ հասարակական գործիչների, Էրդողանի հետ հանդիպմանը մասնակացած անձանց կարծիքները:

Նշյալ պատվիրակության անդամ Իփեք Աքփընարի տեղեկացմամբ` հանրաքվեի մասին իրենց ոչինչ չեն հարցրել: Վարչապետ Էրդողանն իրենց ընդամենը ներկայացրել է իր դիրքորոշումը, ըստ որի, զբոսայգին անհապաղ պետք է դատարկվի, քանի որ այն վնաս է հասցնում զբոսաշրջությանը և դարձել է եկամուտների կորստի պատճառ:

«Թաքսիմի համերաշխության պլատֆորմ»-ը բացասական է արձագանքել հանրաքվեի մասին առաջարկին` նշելով, որ այդ որոշումը հակաօրինական բնույթ ունի:

Թարհան Էրդեմի կարծիքով Գեզի զբոսայգու հետագա ճակատագրի համար պետք է մի նախագիծ ներկայացնել ժողովրդի դատին: Իսկ նախագիծ կազմելու համար անհրաժեշտ է համապատասխան օրենք, որով կհստակեցվի, թե ով կարող է նման նախագծեր կազմել և ներկայացնել:

Հիշեցնենք, որ մայիսի 28-ից Թուրքիայում սկսված զանգվածային բողոքի ցույցերի պատճառն իշխանությունների քաղաքաշինական նոր ծրագիրն է, ըստ որի, Ստամբուլի կենտրոնական Գեզի զբոսայգու մեծ մասը պետք է ոչնչացվեր, իսկ ծառերը` հատվեին: Զբոսայգու ոչնչացմանն ու ծառահատմանն ընդդիմացած ցուցարարների դեմ թուրքական ոստիկանությունը բիրտ ուժ է կիրառել` օգտագործելով արտասվաբեր գազ, ջրցանմեքենաներ, պլաստիկ փամփուշտներ և հատուկջոկատայիններ: Հետևանքը եղավ այն, որ բնապահպանական բնույթի ցույցերն աստիճանաբար վերածվեցին հակառավարական ակցիաների և ընդգրկեցին Թուրքիայի տասնյակ քաղաքներ: Վերջին տվյալների համաձայն` կան հարյուրավոր ձերբակալվածներ, վիրավորներ և 4 զոհ:

Ermenihaber.am