ERMENI HABER AJANSI

Թուրքական «Հաբերլեր» լրատվական կայքը հաղորդում է, որ Լիսաբոնում կտեղադրվի Պորտուգալիայում թուրքական դեսպանատան աշխատակից  Էրքութ Աքբային և նրա կնոջը` Նադիդե Աքբային, նվիրված հուշարձան: Վերջիններս սպանվել էին 1982 թվականի հունիսի 7-ին Հայաստանի ազատագրության հայ գաղտնի բանակի (ASALA) պատժիչ գործողության հետևանքով:
Հուշարձանի բացման արարողությունը տեղի կունենա դեպքի 31-րդ տարելիցի օրը, որին կմասնակցեն Պորտուգալիայում Թուրքիայի դեսպան  էբրու Բարութչու Գյոքդենիզլերը, մահացած զույգի զավակները, հուշարձանի քանդակագործը:

Թուրքիայի ԱԳՆ-ն տարբեր երկրներում ԱՍԱԼԱ-ի կողմից սպանված դիվանագետների համար հուշարձաններ կառուցելու նախաձեռնություն է սկսել:  Նմանատիպ մի հուշարձան էլ կանգնեցվել էր Կանադայում 2012 թվականի սեպտեմբերին, որի բացմանը մասնակցել էր անձամբ Ահմեթ Դվութօղլուն:

Հիշեցնենք, որ ԱՍԱԼԱ-ն 1980-ականներին դարձել էր հայոց պայքարի ու վրեժի խորհրդանիշը: ԱՍԱԼԱ-ն բնական հակազդեցությունն էր ցեղասպանությունից փրկվածների այն զավակների, որոնք տասնամյակներ շարունակ լռելուց հետո ստիպված եղան զենք բարձրացնել: ԱՍԱԼԱ-ն պայքարում էր ոչ միայն զենքով, այլև ուներ իր պաշտոնաթերթը` «Հայաստանը», որ լույս էր տեսնում հինգ լեզուներով ` հայերեն, անգլերեն, արաբերեն, ֆրանսերեն և թուրքերեն: 10 տարվա ընթացքում ԱՍԱԼԱ-ի զինյալներն իրականացրեցին ավելի քան 200 հարձակում թուրք դիվանագետների և քաղաքական գործիչների դեմ աշխարհի տարբեր երկրներում: Այդ տարիներին  թուրքական կառավարությունը գնաց ծայրահեղ քայլի. Անկարան սկսեց իր արտակարգ և լիազոր դեսպաններին զինել և հատկացնել զրահապատ մեքենաներ: 1990-ականների սկզբին ԱՍԱԼԱ-ն ընդհատակ անցավ, բայց երբեք չի հայտարարել իր գործունեությունըկասեցնելու մասին: 

Ermenihaber.am