ERMENI HABER AJANSI

Թաքսիմի պլատֆորմը Թուրքիայում լայմամասշտաբ բողոքի ակցիաների պատճառ դարձած  Գեզի զբոսայգու մասին հայտարարություն է տարածել, որը սկսվում է հետևյալ նախաբանով. «Մեր օրինական պահանջները պաշտպանելիս բացառող լեզվի չդիմելու, առանց որևէ մեկին հատուկ աչքով նայելու` հասկանալու, աշխատելու և ուժից հեռու մնալու համար մեծ ջանքեր ենք գործադրել»: 

CNN TURK-ի տեղեկացմամբ հայտարարությունը պարուրունակում է հետևյալ ուղերձը. «Այսուհետ ևս շարունակելու ենք մեր իրավացի պայքարի վրա ստվեր գցող ամեն տեսակի գործունեություն ծավալողներին զգուշացնել և մեզանից հեռու պահել: Ինչ ճանապարհով ու մեթոդով էլ լինի, ոչ ոքի, ոչ մի խմբի, ոչ մի հասկացության, ոչ մի հավատքի հանդեպ ուժ, բաժանող և բացառող վերաբերմունք, վիրավորանք կամ հայհոյանք չենք ընդունում և խստորեն քննադատում ու դատապարտում ենք: Միասնական կենսակերպին սպառնացող ցանկացած տեսակի արարք ծայրաստիճան վտանգավոր և ձեռք բերված խաղաղ հարաբերությունները խորտակելուն միտված գործողություններ ենք դիտելու»:

Պլատֆորմը նշել է նաև, որ որպես խնդրի լուծման միակ եղանակ տեսնում է բանակցությունների ճանապարհը: 

Հիշեցնենք, որ մայիսի 28-ից Թուրքիայում սկսված զանգվածային բողոքի ցույցերի պատճառն իշխանությունների քաղաքաշինական նոր ծրագիրն է, ըստ որի, Ստամբուլի կենտրոնական Գեզի զբոսայգու մեծ մասը պետք է ոչնչացվեր, իսկ ծառերը` հատվեին: Զբոսայգու ոչնչացմանն ու ծառահատմանն ընդդիմացած ցուցարարների դեմ թուրքական ոստիկանությունը բիրտ ուժ է կիրառել` օգտագործելով արտասվաբեր գազ, ջրցան մեքենաներ, պլաստիկ փամփուշտներ և հատուկջոկատայիններ: Հետևանքը եղավ այն, որ բնապահպանական բնույթի ցույցերն աստիճանաբար վերածվեցին հակառավարական ակցիաների և ընդգրկեցին Թուրքիայի տասնյակ քաղաքներ: Վերջին տվյալների համաձայն` կան հարյուրավոր ձերբակալվածներ, վիրավորներ և 4 զոհ:

Ermenihaber.am