ERMENI HABER AJANSI

Թուրքական «Ջումհյուրեթ» թերթը հայտնում է, որ իշխող «Արդարություն և զարգացում» կուսակցության (ԱԶԿ-AKP) Իգդիրի նահանգային կառույցի քարտուղար Մեհմեթ Սոյուքը կուսակցությունից դուրս գալու դիմում է ներկայացրել` մատնանշելով վերջին օրերին կառավարության որդեգրած դիրքորոշումը:

Մասնագիտությամբ իրավաբան Սոյուքը, որը 7 տարի շարունակ եղել է ԱԶԿ-ի նահանգային կառույցի քարտուղարը, իր հրաժարականը հիմնավորել է երկու պատճառով:

1.  Ստամբուլում կառուցվելիք  3-րդ կամուրջը կրելու է Սելիմ Ահեղ սուլթանի անունը:

2. Գեզի զբոսայգու համար քաղաքացիների մղած պայքարի նկատմամբ իշխանությունների դրսևորած վերաբերմունքը:

«Վերջին շրջանում քաղաքական շարժման, որի շարքերում տարիներ շարունակ գտնվել եմ և աշխատել, փոփոխված համակարգը, առաջ քաշած ելույթները և գործողությունները հասել են այնպիսի չափերի, որ անհամատեղելի են իմ անձի, աշխարհընկալման և հոգևոր արժեքների հետ: Հասարակությանը լարվածության մեջ է պահում այն, որ  ճնշում է  գործադրվում այլ կարծիք ունեցողների վրա: Իշխանությունների սիրտ կոտրող հռետորաբանության, այլ հավատքի տեր անձանց օտարման և նվաստացման պատճառով հրաժարվում եմ իմ պաշտոնից», - հայտարարել է Մեհմեթ Սոյուքը:

Հիշեցնենք, որ մայիսի 28-ից Թուրքիայում սկսված զանգվածային բողոքի ցույցերի պատճառն իշխանությունների քաղաքաշինական նոր ծրագիրն է, ըստ որի, Ստամբուլի կենտրոնական Գեզի զբոսայգու մեծ մասը պետք է ոչնչացվեր, իսկ ծառերը` հատվեին: Զբոսայգու ոչնչացմանն ու ծառահատմանն ընդդիմացած ցուցարարների դեմ թուրքական ոստիկանությունը բիրտ ուժ է կիրառել` օգտագործելով արտասվաբեր գազ, ջրցան մեքենաներ, պլաստիկ փամփուշտներ և հատուկջոկատայիններ: Հետևանքը եղավ այն, որ բնապահպանական բնույթի ցույցերն աստիճանաբար վերածվեցին հակառավարական ակցիաների և ընդգրկեցին Թուրքիայի տասնյակ քաղաքներ: Վերջին տվյալների համաձայն` կան հարյուրավոր ձերբակալվածներ, վիրավորներ և 4 զոհ:

Ermenihaber.am