Օրհան Փամուքն Էրդողանի կառավարությունն անվանել է ավտորիտար

Հասարակական12:38, 05 Հունիս 2013

Օրհան Փամուքն Էրդողանի կառավարությունն անվանել է ավտորիտար

Աշխարհահռչակ թուրք վիպասան, նոբելյան մրցանակի դափնեկիր Օրհան Փամուքը «Süddeutsche Zeitung» և «Guardian» հեղինակավոր պարբերականներում հանդես է եկել հրապարակումներով, որտեղ անդրադարձել է վերջին օրերին Թուրքիայում մոլեգնող հանրային բողոքի ալիքին և իշխանությունների գործադրած բիրտ ուժին:

Ըստ թուրքական «Ռադիքալ»-ի` Փամուքն Էրդողանի ղեկավարած կառավարությունն անվանել է ավտորիտար և բռնաճնշող: Ողջունելով Թուրքիայի քաղաքացիների բողոքի ակցիաները` ի պաշտպանություն Գեզի զբոսայգու և ծառերի, գրողը ներկայացրել է մի փրկված ծառի պատմություն:

Ստամբուլում ապրած տարիներին Փամուքների ընտանիքի տան առջև շագանագի մի մեծ ծառ է եղել: Քաղաքապետարանը հաստատել է պողոտան լայնացնելու մասին նախագիծը, որի հետևանքով հիշյալ ծառը համարվել է կտրվելու ենթակա: Գրողը պատմում է, թե ինչպես են իրենք տնով-տեղով-գերդաստանով ոտքի ելել` ծառահատումը կանխելու: Գիշերները նույնիսկ հերթապահություն են կարգել ծառի շուրջ: Արդյունքում ծառը չի հատվել:

«Թաքսիմի հրապարակը ողջ Ստամբուլի «շագանակի ծառն է» և պետք է պահպանվի: Միլիոնավոր մարդկանց հուշերը կրող այդ հրապարակում և հետնամասի զբոսայգում նախատեսվող փոփոխությունը Էրդողանի կառավարության մեծ սխալն է»,- գրում է Փամուքը:

Ermenihaber.am