ERMENI HABER AJANSI

Թուրքիայի գրեթե բոլոր քաղաքներում տեղի են բողոքի ցույցեր` ընդդեմ կառավարության որոշման: Ցուցարարների և  ոստիկանության միջև բախումների արդյունքում կան բազմաթիվ վիրավորներ և ձերբակալվածներ: Մայրաքաղաք Անկարայի Աթաթուրքի անվան զբոսայգում հավաքված ցուցարարներին  ոստիկանությունը ուժով ցրել է: Ցուցարարները նստարանները պոկելով արգելապատնեշ են սարքել, քարեր նետել  ոստիկանների և զրահամեքենաների վրա: Ոստիկանական ուժերն արցունքաբեր գազի կիրառմամբ ցրել են ցուցարարներին:

Թուրքական «Ջիհան» լրատվական գործակալության փոխանցմամբ` օգտագործված արցունքաբեր գազի պատճառով մեջլիսի հարևանությամբ գտնվող զբոսայգին պատված է եղել թանձր ծխով, իսկ տարածքը ավելի շուտ հիշեցնում է պատերազմի դաշտ, քան զբոսայգի:

Իսկ թուրքական «Սոնդաքիքա» կայքը տեղեկացնում է, որ բացի Անկարայից ցուցեր են տեղի ունեցել նաև Իզմիրում և երկրի այլ քաղաքներում:

Իզմիրում, ցուցարարները հավաքվելով Ալսանջաք հրապարակում, քայլերթով փորձել են հասնել Բասմանեյի հրապարակ, որի ընթացքում էլ ոստիականական ուժերի և ցուցարաների միջև լարվածություն է առաջացել: Վերջիններս, հասնելով Թալեաթ փաշայի անունը կրող զբոսայգի, փակել են ճանապարհները, աղբատար մեքենաները վառելով արգելապատնեշ են սարքել: Թուրքական կայքի փոխանցմամբ` ոստիկանությունը միջամտել է ջրցան մեքենաներով:

Բոլուում, Ադանայում նույնպես  ցույցեր են եղել:  Բոլուում քաղաքապետարանի առջև հավաքված  շուրջ 1000 հոգանոց խումբը փակել էր Ստամբուլից Անկարա գնացող մայրուղին: Իսկ Ադանայում ցուցարարների շարքում էր նաև պոլսահայ հայտնի ռոք երգիչ Հայկո Ջեփքին: Նա նշել է, որ Ադանա եկել էր համերգ տալու, սակայն լսելով ցույցի մասին, ցանկացել է իր մասնակցությամբ աջակցել ցուցարարներին:

Իզմիթում ցույցերի մասնակցիներից 50, իսկ Աֆյոնգարահիսարում 21 հոգի է ձերբակալվել:

Թուրքիայի գրեթե ամբողջ տարածքը ընդգրկած բողոքի ակցիաների պատճառը Ստամբուլում Թաքսիմի Գեզի զբոսայգին է: Թուրքական իշխանությունների որոշմամբ զբոսայգին պետք է քանդվի, իսկ ծառերը` հատվեն, ինչն առաջացրել է բնապահպանների և քաղաքացիների դժգոհությունը: Այն ավելի մեծ չափերի է հասել, երբ վարչապետ Էրդողանը Ստամբուլի 3-րդ կամրջի կառուցման աշխատանքների ժամանակ այս թեմայով հայտարարել էր. «Ինչ անում եք, արեք: Մենք այդտեղի համար որոշում ենք կայացրել և իրագործելու ենք»:

Թաքսիմի հրապարակում մայիսի 28-ից սկսված բողոքի ցույցերը, ի պաշտպանություն Գեզի զբոսայգու պահպանման,  իրենց գագաթնակետին են հասել մայիսի 31-ին:

Թուրքական «Հաբերա» լրատվական կայքը տեղեկացնում է, որ մայիսի 31-ին ցուցարարների նկատմամբ  ոստիկանության կողմից ուժի (արցունքաբեր գազի և ջրցան մեքենաններ) կիրառման  հետևանքով բազմաթիվ մարդիկ ստացել են տարբեր աստիճանների վնասվածքներ:

Ցուցարաներին այս ընթացքում իրենց աջակցությունն են հայտնել Թուրքիայի ընդդիմադիր կուսակցությունները: Ստամբուլում ցուցարարներին շարքերում են եղել և «Ժողովրդահանրապետական», և´ «Ազգայնական շարժում», և´ քրդական «Խաղաղություն և ժողովրադավարություն» կուսակցությունների ներկայացուցիչները:

 Ermenihaber.am