Haberdar. Հրանտ Դինքը Թուրքիայում սպանված 62-րդ լրագրողն է վերջին 100 տարում

Հասարակական09:00, 15 Մայիս 2013

Haberdar. Հրանտ Դինքը Թուրքիայում սպանված 62-րդ լրագրողն է վերջին 100 տարում

Թուրքական «Հաբերդար» լրատվական կայքը «Ո°վ է Հրանդտ Դինքը» վերտառությամբ հոդված է հրապարակել, որտեղ ներկայացվում են Ստամբուլում լույս տեսնող երկլեզու «Ագոս» շաբաթաթերթի հիմնադիր-խմբագրապետ Հրանտ Դինքի մասին կենսագրական տվյալներ:

Մալաթիայում ծնված Դինքը ծնողների բաժանությունից հետո իր երկու եղբայրների հետ հանձնվել է Գեդիքփաշայի մանկատուն: Բարձրագույն կրթությունը ստացել է Ստամբուլի համալսարանի Կենսաբանության և փիլիսոփայության ֆակուլտետներում: Զինվորական ծառայությունից հետո անցնում է լրագրողական աշխատանքի: Ընտանիք է կազմում նույն մանկատանն իր հետ մեծացած հայուհի Ռաքել Դինքի հետ:

Դինքը միշտ հալածվել է Հայոց ցեղասպանության հարցում թուրքական պաշտոնական տեսակետին հակադրվելու համար: Հոդվածագիրը հիշեցնում է, որ 2002-ին Ուրֆայի համալսարանում կազմակերպված կոնֆերանսի ժամանակ ունեցած ելույթից հետո Դինքի դեմ քրեական գործ է հարուցվում: Նա մեղադրվում էր Թուրքիայի քրեական օրենսգրքի 301-րդ հոդվածով, իբր վիրավորել է թուրքական ինքնությունը` ասելով. «Ես թուրք չեմ, ես Թուրքիաից եմ, ես հայ եմ»: Դատապարտվելով 3 տարվա ազատազրկման այնույհետև արդարացվում է:

Հաջորդ քրգործը Դինքի նկատմամբ հարուցվել է 2004 թվականին, երբ «Ագոս»-ում տպագրվել էր նրա «Ծանոթանալ Հայաստանի հետ» հոդվածը, որտեղ Դինքը խոսել է թուրքերի արյան մաքրության անհրաժեշտության մասին` ասելով. «Դատարկվելիք թունավոր արյան փոխարեն թուրքի երակները լցնելիք մաքուր արյունն առկա է հայկական երակում»: Այդ դատավարության համար Դինքը պատրաստվում էր դիմել Մարդու իրավուքնների եվրոպական դատարան: Նշվում է, որ նրա սպանության ժամանակ ընթացքի մեջ էին նրա դեմ բացված երկու դատեր:

Հրանտ Դինքը սպանվել է 2007-ին հունվարի 19-ին անչափահաս Օգյուն Սամասթի արձակած հրազենային կրակոցներից Ստամբուլի Շիշլի թաղամասում գտնվող «Ագոս»-ի խմբագրատան առջև:

Հիշեցնելով, թե ինչպես էր Դինքի հուղարկավորության ժամանակ բազմամարդ թափորը վեր պարզել «Բոլորս Հրանտ ենք, բոլորս հայ ենք» գրությամբ պաստառներ` հոդվածագիրը նշում է. «Հրանտ Դինքը եղավ 1909 թվականից այս կողմ Թուրքիայում սպանված 62-րդ լրագրողը»:

Ermenihaber.am