Թուրքիայի կրոնական կառույցների ժամանակակից հայ ճարտարապետը

Մշակութային10:25, 06 Մայիս 2013

Թուրքիայի կրոնական կառույցների ժամանակակից հայ ճարտարապետը

Թուրքական «Էնսոնհաբեր» լրատվական կայքը փոխանցում է, որ Մալաթիայում ծնված և 6 տարեկանում Ստամբուլ տեղափոխված Գևորգ Օզքարագյոզն առանց նյութական փոխհատուցման ակնկալիքների նախագծում և կառուցում է մզկիթներ, եկեղեցիներ և ալևիների սրբատեղիներ`ջեմևիներ: Միջանկյալ նշենք, որ ջեմևիները Թուրքիայում չունեն որևէ իրավական կարգավիճակ` որպես պաշտամունքի վայրեր, և պետության կողմից դիտվում են որպես մշակութային տներ: Ալևիների պահանջներից մեկն է` տալ ջեմևիներին իրավական կարգավիճակ, որտեղ կկարողանան ազատորեն կատարել ծեսեր:

1994 թվականին Օզքարագյոզը Ստամբուլում կրկին անվարձահատույց ջեմևի է կառուցել, 2000-ին Հայոց պատրաիարքարանի շենքի վերակառուցման աշխատանքներն է կատարել, 2010-ին Ստամբուլը Եվրոպայի մշակութային մայրաքաղաք գործակալության հետ միասին Գումքափըյում գտնվող հայկական սուրբ Որդվոց Որոտման եկեղեցու մշակութային կենտրոնի վերածման աշխատանքներն է իրագործել:

Վերջին շինությունը, որը կառուցել է հայ ճարտարապետը, եղել է Բալըքեսիրի Պլեվնե մզկիթը: Այն կառուցվել է տեղական ինքնակառավարման մարմինների հետ համագործակցությամբ: Անդրադանալով Պլեվնեյի մզկիթի կառուցման առաջարկին, որն արվել էր տեղական ինքնակառավարման մարմնի ղեկավարի կողմից` Օզքարագյոզը նշել է, որ մզկիթի կառուցման նախագիծը հայ ճարտարապետին հանձնարարելը մեծ խիզախության օրինակ է:

Երկու շաբաթ առաջ Բալըքեսիրի, Գյոնենի, Բանդըրմայի մուֆթիների, քաղաքապետերի մասնակցությամբ տեղի է ունեցել մզկիթի բացման արարողությունը: Մզկիթում առաջին ուրբաթօրյա նամազին մասնակցել է նաև հայ ճարտարապետը: Նախագծի ավարտից հետո նա ասել է «Ես քրիստոնյա եմ և եկեղեցի եմ գնում: Սակայն յուրաքանչյուր կրոն և հասարակությանը փորձում եմ հասկանալ: Նախագծերն էլ իրականացնելիս այս ընկալամբ, մոտեցմամբ եմ աշխատում: Գյոնենում առաջին անգամ ուրբաթօրյա նամազի եմ մասնակցել: Այսպիսի բաներից երբեք անհանգստություն չեմ զգում: Չնայած, որ Մալաթիայում եմ ծնվել, այնուամենայնիվ, 7 տարի է, ինչ Գյոնենում աշխատում եմ և փողոցում արդեն առանց օտարություն զգալու շրջում եմ մարդկանց հետ, որոնց դիտում եմ որպես իմ համաքաղաքացիներ: Քաղաքական գործիչները, քաղաքացիներն էլ ինձ ջերմորեն են վերաբերվում»:

Ermenihaber.am