Hurriyet. Հայերը մի քանի օր ցույցեր կկազմակերպեն, և որոշ ժամանակ անց ամեն ինչ կրկին կմոռացվի

Հասարակական10:34, 02 Ապրիլ 2013

Hurriyet. Հայերը մի քանի օր ցույցեր կկազմակերպեն, և որոշ ժամանակ անց ամեն ինչ կրկին կմոռացվի

Թուրքական «Հյուրիեթ» թերթի վաշինգթոնյան թղթակից Թոլգա Թանըշն իր հոդվածում անդրադարձել է ապրիլքսանչորսյան հերթական զարգացումներին, Օբամայի ամենամյա ուղերձին և Էրդողանին` Վաշինգթոն կատարելիք հնարավոր այցին: Թեև Միացյալ Նահանգներից դեռևս ոչ մի հստակ տեղեկություն չկա այցելության մասին, բայց Էրդողանն ասել է, որ դա նախատեսված է մայիսին: Այնուամենայնիվ, եթե կայանա Թուրքիայի վարչապետի այցը Վաշինգթոն, նա կհանդիպի ԱՄՆ նախագահ Բարաք Օբամայի հետ:

«Սպիտակ տան ղեկավարի հետ հանդիպման ժամանակ առանցքային կլինի իսրայելական խնդիրը: Գուցե և Միացյալ Նահանգերի նախագահ Օբամայի կողմից պատմության մեջ առաջին անգամ ի պատիվ թուրք պաշտոնիայի պետական ճաշ տրվի: Բայց պետական ճաշի վերաբերյալ Էրդողանի ունեցած ակնկալիքները զուտ պատրանք մնան, քանի որ պետական ճաշ տրվում է միայն պետության առաջին այրերին, իսկ Թուրքիայում դա ի պաշտոնե Աբդուլլահ Գյուլն է, ոչ թե Էրդողանը»,- նկատել է տալիս հոդվածագիրը:

Վերջինս նաև նշում է, որ Հայոց ցեղասպանության 98-րդ տարելիցի կապակցությամբ Օբամայի ելույթը մեծ հետաքրքրրություն է առաջացրել Թուրքիայում: Սպասվում է, որ Օբաման իր խոսքում կկրկնի նախկին ելույթներում տեղ գտած բովանդակությունը, և հարկ կհամարի կոտորված հայերի հիշատակին հարգանքի տուրք մատուցել: Իսկ թուրքական կողմն էլ, վերլուծաբանի համոզմամբ, իր հերթին հակընդդեմ ճառով հանդես կգա, որտեղ կքննադատի պատմությունը իբր միակողմանի ներկայացնողներին:

«Այս օրերին իր հերթին ակտիվ գործունեություն կծավալի նաև հայկական սփյուռքը՝ իր բողոքն արտահայտելով այն մասին, որ Օբաման կրկին չի արտաբերել Ցեղասպանություն եզրաբառը: Արդյունքում կհայտնվեն երեք դժգոհ կողմ՝ հայերը, թուրքերը և տուժածի դերում հայտնված Օբաման: Հայերի կողմից մի քանի օր ցույցեր կկազմակերպվեն, և որոշ ժամանակ անց ամեն ինչ կրկին մոռացության կենթարկվի»- եզրակացնում է Թոլգա Թանըշը:

Ermenihaber.am