ERMENI HABER AJANSI

Թուրքիայի վիճակագրական ծառայության (TÜİK) կատարած ուսումնասիրությունները ցույց են տվել, թե որոնք են երկրի ծերացող ու երիտասարդացող նահանգները:

Այս մասին տեղեկացնող «Zaman» պարբերականը հայտնում է, որ առկա տվյալների համաձայն` բնակչության տարիքային ցուցանիշով ամենածեր նահանգը սևծովյան տարածաշրջանում գտնվող Սինոփն է, որի բնակչության 16.3 տոկոսը 65 տարեկանից բարձր է: Սինոփին հաջորդում են Քասթամոնու, Չանքըրը, Գիրեսուն  և Արդվին նահանգները:

Երիտասարդ բնակչության ցուցանիշով առաջին տեղը զբաղեցրել է հարավ-արևելյան Շըրնաք նահանգը, որի բնակիչների 42 տոկոսը 14 տարեկանից ցածր է: Շըրնաքին հաջորդում են քրդական հոծ բնակչություն ունեցող Շանլըուրֆա, Աղրը, Սիիրթ (պատմական Սղերթ) և Մուշ նահանգները:

Աղբյուրը նշում է, որ եվրոպական երկրների ծերացող բնակչության հիմնախնդիրն աստիճանաբար  ծագում է նաև Թուրքիայում: Վերջին տարիների մարդահամարի տվյալները վկայում են, որ Թուրքիայում տարեցտարի նվազում են բնական աճի տեմպերը, փոխարենը արագորեն ավելանում է տարեց բնակիչների թիվը:

Այսպես`

2009-ին արձանագրվել էր  14.5 տոկոս բնական աճ:

2010-ին բնական աճը նվազել և կազմել էր 12 տոկոս:

2008-ին երկրի բնակչության 6.8 տոկոսն էր 65  և բարձր տարիքի:

2012-ին տարեց բնակչությունն արդեն կազմել է 7.5 տոկոս:

Հիշեցնենք, որ 2012-ի մարդահամարի արդյունքների համաձայն` Թուրքիայի բնակչությունն ավելի քան 75.6 միլիոն է: Արական սեռը կազմում է բնակչության 50.2 տոկոսը (37.965.168), իգական սեռը` 49.8 տոկոս (37.671.216): 

Ermenihaber.am