ERMENI HABER AJANSI

Թուրքական «Zaman» օրաթերթը ներկայացրել է Թուրքիայի վիճակագրական ծառայությունը (TÜİK) հրապարակած 2012 թվականի մարդահամարի արդյունքները:

Պետք է նշել, որ մարդահամարն իրականացվել է ոչ թե ըստ անձի ֆիզիկական ներկայության, այլ` Թուրքիայում գրանցված լինելու հանգամանքի: Ըստ այդմ` պարզվել է, որ 2011թ. համեմատությամբ 2012թ. Թուրքիայի բնակչության թիվն ավելացել է 903.115-ով` հասնելով 75.627.384-ի: 2011թ. տվյալներով` երկրի բնակչության թիվը 74.742.269 էր:

Արական սեռը կազմում է Թուրքիայի բնակչության 50.2 տոկոսը (37.965.168), իգական սեռը` 49.8 տոկոս (37.671.216): Թուրքիայի 81 նահանգներից ամենամարդաշատը ներկայումս Ստամբուլն է, որտեղ ապրում է երկրի բնակչության 18.3 տոկոսը (13.854.740): Այդ նահանգում բնակչության թիվն 2011-ի համեմատ ավելացել է 1.7 տոկոսով: Ստամբուլին հաջորդում են Անկարան, որտեղ բնակվում է 4.965.542 մարդ և Իզմիրը, որտեղ բնակվում է 4.005.459 մարդ: Ամենաքիչ բնակչությամբ նահանգը Բայբուրթն է, որտեղ բնակվում է 75.797 մարդ:

15-64 տարիքային խմբում, որը համարվում է աշխատուժի խումբ, ընդգրկված է բնակչության 67.6 տոկոսը (51.088.202): 0-14 տարեկան մանուկները կազմում են Թուրքիայի բնակչության 24.9 տոկոսը (18.857.179), իսկ 65 և ավելի տարիք ունեցողները` 7.5 տոկոս (5.682.003):

Ermenihaber.am