Թուրքիայի ազդեցիկ կուսակցությունների վարկանիշը

Հասարակական08:14, 11 Մայիս 2012

Թուրքիայի ազդեցիկ կուսակցությունների վարկանիշը

«CnnTurk» լրատվական ծառայությունը հայտնում է, որ հանրային կարծիքի ուսումնասիրմամբ զբաղվող «Pollmark» կազմակերպությունը սոցհարցում է անցկացրել Թուրքիայի 26 քաղաքաներում` պարզելու, թե որ քաղաքական ուժին նախապատվություն կտան, եթե հենց հիմա ընտրություններ անցկացվեն Թուրքիայում:

Հարցման ենթարկված 5.150 քաղաքացիների 52.4 տոկոսը պատրաստակամություն է հայտնել իր ձայնը տալ իշխող «Արդարություն և զարգացում» կուսակցությանը (ԱԶԿ-AKP), 24.5 տոկոսը` «Ժողովրդահանրապետական կուսակցությանը» (ԺՀԿ-CHP), 11.4 տոկոսն էլ` «Ազգայնական շարժում» կուսակցությանը (ԱՇԿ-MHP): Քրդական «Ժողովրդավարություն և խաղաղություն» (ԺԽԿ-BDP) կուսակցության օգտին արտահայտվել է հարցվածների 7.4 տոկոսը:

Ամենաշատ համակրանքի արժանացած քաղաքական գործիչների շարքում առաջին տեղը 41.7 տոկոս ցուցանիշով զբաղեցրել է Թուրքիայի գործող վարչապետ Ռեջեփ Թայիփ Էրդողանը: Գլխավոր ընդդիմադիր ուժի` ժողովրդահանրապետականների առաջնորդ Քեմալ Քըլըչդարօղլուն 7.6 տոկոսով հանգրվանել է երկրորդ տեղում: Ազգայնականների առաջնորդ Դևլեթ Բահչելին 3.2 տոկոսով եզրափակել է եռյակը:

Նշենք, որ «Արդարություն և զարգացում»-ը չափավոր իսլամամետ քաղաքականություն վարող կուսակցություն է: Հիմնադրվել է Էրդողանի և նրա համախոհների կողմից 2001թվականին:

«Ժողովրդահանրապետական կուսակցությունը» քեմալիզմի դրույթներով առաջնորդվող ձախակողմյան քաղաքական ուժ է: Ստեղծվել է Թուրքիայի Հանրապետության հիմնադիր և առաջին նախագահ Մուստաֆա Քեմալ Աթաթուրքի կողմից 1923 թվականին:

«Ազգայնական շարժում» կուսակցությունն ազգայանական հայացքներով ընդդիմադիր կուսակցություն է, որը հայտնի է իր ընդգծված հայատյացությամբ և համարվում է «Գորշ գայլեր» ահաբեկչական կազմակերպության քաղաքական թևը: Հիմնադրվել է 1969թ. Ալփարսլան Թյուրքեշի կողմից: