CNNTurk: Կանաչ լույս քրդերեն երգին Եվրատեսիլում

Մշակութային09:00, 17 Ապրիլ 2012

CNNTurk: Կանաչ լույս քրդերեն երգին Եվրատեսիլում

«CnnTurk» լրատվական ծառայության տեղեկացմամբ` Թուրքիայի պետական (TRT) հեռուստաընկերութան տնօրինությունը արտոնել է առաջիկայում «Եվրատեսիլ» միջազգային երգի մրցույթին քրդերեն երգ ներկայացնելու հնարավոր նախաձեռնությունը:

Քրդական «Խաղաղություն և ժողովրդավարություն» կուսակցության (ԽԺԿ-BDP) պատգամավոր Սըրրը Սաքըքը Թուրքիայի փոխվարչապետ Բյուլենթ Արընչին գրավոր հարց է ուղղել, այն մասին, թե արդյոք հնարավոր է առաջիկայում Թուրքիան «Եվրատեսիլ»-ին ներկայանա քրդերեն կատարումով և քուրդ կատարողով: Պատգամավորը հիշեցրել է, որ Թուրքիան միջազգային այդ երգի մրցույթին բազմիցս մասնակցել է անգլերեն երգերով:

Փոխվարչապետի փոխարեն նրա անունից հարցին պատասխանել է Թուրքիայի պետական (TRT) հեռուստաընկերութան տնօրեն Իբրահիմ Շահինը: Հիշեցնելով, որ Եվրոպայի հեռարձակողների միությունը 1999-ին փոփոխություն է կատարել «Եվրատեսիլ»-ին մասնակցող երկրների` իրենց մայրենի լեզվով հանդես գալու մասին օրենքը, ինչի շնորհիվր մրցույթի մասնակից երկրները հնարավորություն ստացան այլ լեզուներով երգեր ներկայացնել, Շահինը մասնավորապես ասել է հետևյալը. «Մասնակիցները հիմնականում նախընտրում են անգլերեն երգերով հանդես գալ, որպեսզի ավելի մեծ թվով լսարանի համար հասկանալի լինի իրենց երգածի բովանդակությունը: Օրինակ` 2010թ. և 2011թ. «Եվրատեսիլ»-ին մասնակցած 25 երկրներից միայն երկուսն են իրենց մայրենի լեզվով երգ հնչեցրել: Այնպես որ որևէ խոչընդոտ չկա, որ առաջիկա տարիներին «Եվրատեսիլ»-ում Թուրքիան ներկայացվի այլ լեզվով կատարվող երգով»: